Sistemi bankar – Janari me fitim, kreditë me probleme 13.5%
Sistemi bankar e nisi vitin 2018 me rezultate fitimprurëse. Sipas statistikave të performancës, publikuar nga Banka e Shqipërisë, kthimi nga kapitali ose fitimi në raport me kapitalin aksioner rezultoi në nivelin 4.1%.
Megjithëse ecuria ngelet pozitive, treguesi më domethënës i përfitueshmërisë ka pësuar një korrektim të ndjeshëm krahasuar me janarin e vitit të kaluar, kur ishte rreth tre herë e gjysëm më i lartë.
Për vitin 2017, sistemi bankar shënoi një fitim rekord në vlerë absolute, ndërsa në termat të kthimit nga kapitali fitimi iu afrua nivelit 16%, më i larti prej afërsisht një dekade.
Raporti i kredive me probleme shënoi një rritje të lehtë në 13.5%, nga 13.2% që kishte qenë në fund të vitit 2017.
Sidoqoftë, ky tregues është rreth pesë pikë përqindjeje më i ulët krahasuar me të njëjtën periudhë të një viti më parë dhe është në nivelet më të mira që prej vitit 2010.
Treguesi i kredive me probleme duket më i stabilizuar, falë pastrimeve të shumta të kryera në tre vitet e fundit, si edhe përmirësimit të mekanizmave si ristrukturimi apo ekzekutimi i detyrueshëm i kolateralit.
Megjithatë, për t siguruar një ulje të qëndrueshme e rëndësishme do të jetë që kreditimi të rritet me ritme më të larta, çka do të ulte peshën e kredive ekzistuese me probleme në bilancet e bankave.
Treguesit më të rëndësishëm rregullatorë për sistemin bankar ngelen në nivele mjaft të larta. Raporti i mjaftueshmërisë së kapitalit është 16.6%, ndërsa raporti i aktiveve likuide ndaj detyrimeve afatshkurtra është rritur më tej në 41.3%.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.