Situata e grurit në Kosovë më keq nga sa mendohej – Sigurohet buka vetëm për ¼ e popullsisë

Rendimenti i grurit për vitin 2017 rezulton të jetë më i ulëti në të paktën 10 vitet e fundit. Shqetësimi vjen nga Kryetari i Federatës Sindikale të Bujqve të Kosovës, Tahir Tahiri, i cili shprehet se sasia e korrur ka siguruar vetëm 25% të bukës.

Rendimenti sipas tij është rreth 2700 kilogramë për hektarë, shumë më e ulët nga parashikimi i Korrikut i Ministrisë së Bujqësisë, që e llogariste në 3500-4500 kilogramë për hektarë.

Prodhimi rezulton shumë i dobët edhe për shkak të mbjelljes së rreth 30 mijë hektarëe më pak nga viti i kaluar.

“Rendimente kaq të ulëta vijnë edhe si pasojë e konkurrencës jo të drejtë nga importi që po lejon Qeveria me sjell mullixhinjtë dhe tregtarët kosovarë grurë të kualitetit të dobët me çmime shumë të ulëta prej 12 deri 14 centë”, ka thënë Tahiri.

Në bazë të një raporti rezulton se 205 kilogramë grurë nevojiten për frymë. Nëse e llogarisim me numrin e përgjithshëm të banorëve në Republikën e Kosovës, atëherë rezulton se nevojiten 410 mijë tonë grurë.

Nëse shifrat e Federatës Sindikale të Bujqve janë të sakta, atëherë Kosova do të ketë prodhuar këtë vit vetëm 145 mijë tonë grurë, ose sa për 35% të popullsië, shifër kjo gjithsesi konsiderueshëm më e ulët se prodhimi i vitit të kaluar.

Fermerët bënë fajtor për këtë situatë keqpërdorimin e subvencioneve dhe granteve nga Ministria e Bujqësisë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.