Situata e përmbytjeve në Shkodër ende e rënduar – 1415 hektarë nën ujë. Blegtoria në vështirësi
Pavarësisht mbylljes së portave të shkarkimit të hidrocentraleve në kaskadën e Drinit, situata në Bashkinë e Shkodrës vazhdon të jetë e rënduar. Deri në mëngjesin e të dielës regjistrohen nën ujë rreth 1415 hektarë tokë.
Njësitë më të prekura janë Ana e Malit dhe Dajçi, ndërsa gjendja është e vështirë edhe në Rrethina dhe Bërdicë, ku dhjetëra hektarë janë nën ujë. Rreziku ndërkohë është shumë i madh edhe në fshatin Luarz në Velipojë, pasi nga argjinatura futet ujë.
Një pjesë e konsiderueshme e tokave nën ujë është e mbjellë me kultura bujqësore, kryesisht foragjere dhe jonxhë, por ka dhe një sipërfaqe jo të vogël të mbjellë me grurë, bimë dekorative, apo me sera, vreshta e ullishte.
Posted by Bashkia Shkodër on Sunday, March 11, 2018
Specialistët janë në terren për të bërë vlerësimin e dëmeve, ndërsa duket se përmbytjet kanë shkaktuar mungesa në nevojat për bazë ushqimore për blegtorinë. Nevoja ditore për gjedhët, bagëtitë dhe kafshët e tjera është 3835 kg koncentrat, 7190 kg bar i thatë dhe 3135 kg silazh.
Në dy njësitë me bilancin më të vështirë numërohen rreth 637 gjedhë, 700 krerë të imta dhe 70 krerë derra.
Pas tërheqjes së ujit në zonat e përmbytura do të lindë gjithashtu nevoja për dezinfektimin me klor.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.