Situata e zjarreve, Emergjencat Civile: Rreziku i lartë, dy vatra të reja në Dibër dhe Lezhë
Rreziku i rënies së zjarreve mbetet i lartë edhe pse sapo kemi hyrë në muajin korrik. Sipas Emergjencave civile, dy vatra te reja zjarri janë shfaqur gjatë 24 orëve të fundit, në Dibër dhe Lezhë.
Si pasojë e zjarrit në fshatin Gurë Lurë, Njësia Administrative Lurë u dogj një sipërfaqe rreth 2 ha me shkurre dhe pisha.
Shërbimi vendor i mbrojtjes nga zjarri Dibër, ka shkuar në vendngjarje në ndihmë për shuarjen e zjarrit po ashtu në vendngjarje kanë shkuar dhe punonjës nga Agjencia e Zonave të Mbrojtura si dhe banorë të zonës.
Pas një pune të gjatë zjarri është shuar. Një tjetër vatër zjarri është shfaqur në Qarkun Lezhë mbrëmjen e djeshme, në qytetin Laç ka rënë zjarr në një sipërfaqe pyjore me shkurre dhe pisha.
Shërbimi vendor i mbrojtjes nga zjarri Laç të cilëve u janë bashkuar edhe 60 forca ushtarake kanë mundur të shuajnë flakët duke parandaluar përhapjen e zjarrit. Si pasojë u dogj një sipërfaqe e konsiderueshme me shkurre dhe pisha.
Drejtoria e Përgjithshme e Emergjencave Civile u kërkon të gjithë qytetarëve që në rast se konstatojnë zjarre, të njoftojnë menjëherë në numrat e emergjencave 112, 129, apo në Qendrën Kombëtare Operacionale të Emergjencave Civile.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.