Situata “gri” në sektorin e ujit – Raporti i ERRU: Mbi 63% e ujit humbet në rrjet, 27% vidhet
Pavarësisht përmirësimeve të disa treguesve në sektorin e ujësjellës-kanalizmeve, Bilanci i Ujit 2019, i publikuar pak javë më parë nga Enti Rregullatori i Ujit flet për nivele të larta të ujit pa të ardhura, si dhe faturime afrofe për konsumatorët. Referuar dokumentit, “Uji Pa të Ardhura” rezulton në nivelin 63.82%, me tendencë të lehtë përmirësimi krahasuar me vitin 2018. Në vitin 2013, vit në të cilin është hartuar për here të parë një Bilanc Uji për sektorin, ky tregues ka qenë në vlerën 69%, pra tendenca e përmirësimit të tij vazhdon të mbetet historikisht me një ritëm mjaft të ngadaltë.
Ndërkaq, rreth 63% e ujit që prodhohet humbet në rrjet, teksa humbjet administrative përbëjnë 54% të humbjeve të përgjithshme, gjë që tregon mbi domosdoshmërinë imediate të përmirësimit të menaxhimit nga stafi kyç i shoqërive UK. Sipas raportit, prezenca e lidhjeve të paligjshme dhe eliminimi i tyre prej shoqërive mbetet ende emergjente, pasi sasia e ujit që humbet nga vjedhjet arrin në 27.2%.
Gjithashtu, të dhënat tregojnë se sasia e ujit të faturuar në të gjitha kategoritë e konsumatorëve është rreth 36.18% e sasisë së ujit të prodhuar, çka bën që nga totali i sasisë së ujit të prodhuar,vetëm 73% e tij faturohet i matur ndërsa pjesa tjetër faturohet afrofe. Një tjetër problem përbën edhe matja e ujit të prodhuar, niveli i të cilit arrin në 52% Ky tregues, gjatë vitit 2019 ka patur tendencë rënie në nivelin 2%, ndërkohë që sipas ERRU-së mungesa e matësve në pikat e prodhimit të ujit mbetet akoma një problem evident i pazgjidhur.
Ndërkaq, sipas ERRU-së sektori i ujësjellës-kanalizimeve vazhdon të karakterizohet nga punësime me baza militantizimi partiak dhe jo mbi baza të nevojave reale të shoqërive për shtesë stafi dhe sipas kualifikimeve të duhura, çka evidenton se treguesi për efiçencën e stafit në këto shoqëri krijon kosto të larta e të panevojshme. Në fund të raportit, Enti Rregullator jep një sërë rekomandimesh për shoqëritë e ujësjellës-kanalizimeve, duke theksuar nevojën për instalimin e ujëmatësve.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.