Situata nga zjarret, Gonxhe: Bashkitë u gjendën të papërgatitura, shkak mungesa e fondeve dhe e stafeve
Dy vjet pas Reformës territoriale, bashkitë vijojnë të kenë probleme në administrimin e kompetencave të deleguara nga pushteti qendror, për shkak të mungesës së fondeve por edhe të stafeve të duhura. Gjatë verës, bashkitë janë gjetur të papërgatitura për përballimin e situatave emergjente nga zjarret.
“Kalimi i kompetencave, i pashoqëruar edhe me fondet përkatëse, ishte sfidë e madhe për përballimin e zjarreve”, deklaroi Blendi Gonxhe, drejtor i Agjencisë së Parqeve dhe Rekreacionit në bashkinë e Tiranës.
I ftuar në emisionin e mëngjesit “Përtëfol” në TV SCAN, Gonxhe tha se Agjencia e Parqeve dhe Rekreacionit, pas Reformës territoriale ka në administrim të gjithë shërbimin pyjor dhe kullosor të Tiranës, afërsisht 40 mijë hektarë tokë, por zjarret që në 80% të rasteve ishin të qëllimshme, shkrumbuan të paktën 5 hektarë pyje.
Ndërsa sipas tij thatësira shkaktoi probleme tek pemët e reja të mbjella gjatë vitit të fundit.
Ndonëse ekzistojnë disa institucione që kanë kompetenca të ndryshme lidhur me zonat pyjore, Gonxhe thotë se nuk ka pasur një bashkërendim të punës siç duhet, duke evidentuar se një pjesë e madhe e punonjësve të tyre janë të pakualifikuar.
Lidhur me Parkun e madh të Tiranës, Gonxhe tregon se do të vijojnë projektet, për të krijuar hapësira dhe mundësi të shumta për argëtim dhe sporte.
Gjatë realizimit të projekteve, drejtori i Parqeve dhe Rekreacionit, përmend si një ndër problemet kryesore edhe shpronësimin e objekteve që kanë marrë tokën në përdorim, nga ish komisionet e ndarjes së pronave.
Dafina Hysa/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.