Situata nga zjarret, Prençi: Më shumë raste se qershori 2016, pritet përkeqësim i situatës
Mbi 15 ha pyje, 20 ha kullota, si dhe 3 dynym fruti-kulturë janë djegur nga zjarret në qarqe të ndryshme të vendit, brenda muajit qershor. Kreu i drejtorisë së Emergjencave Civile, Shemsi Prençi deklaroi për televizionin SCAN se shkaqet kryesore janë temperaturat e larta dhe thatësira e krijuar. Prençi shtoi se situata aktualisht është nën kontroll, por pritet që ditët në vijim gjendja të përkeqësohet.
“Normalisht zjarre gjatë verës ka pasur edhe vitin e kaluar edhe sivjet. Data 30 Qershor ka qenë data me intensitetin më të lartë të zjarreve, që e kalonte të vitit të kaluar, 16 vatra zjarri brenda harkut kohor të 24 orëve. Situata sipas Shërbimit Meteorologjik pritet të jetë kritike, për shkak të temperaturave të larta dhe verës së zgjatur, duke qenë se ka kohë që në territorin e Republikës së Shqipërisë nuk bie shi”, u shpreh Shemsi Prençi.
Kreu i Emergjencave Civile u shpreh se janë marrë të gjitha masat për përballimin e situatave gjatë muajve të verës edhe në rastet e rënies së zjarreve në terrenet e thyera.
“Ne jemi të përgatitur për situata më të vështira, për ta luftuar zjarrin jo vetëm me mjetet dhe ekipet e shpërthimit të ekipit zjarrfikës, por edhe me operacione nga ajri për të cilat kemi garancinë që do të na mbështesë Ministria e Mbrojtjes dhe kompanitë private të cilat jemi në procedurë të lidhjes së kontratave”, tha Prençi.
Prençi u bën thirrje qytetarëve të tregohen të kujdesshëm dhe të raportojnë për rastet e konstatimit të zjarreve, në mënyrë që të ndërhyhet ne kohë.
“Nuk është koha dhe momenti për të hapur panik, por është koha për të sensibilizuar opinionin publik që të tregohen të kujdesshëm, bashkëpunues me strukturat e pushteti vendor dhe strukturat shtetërore, në mënyrë që së bashku ta kalojmë këtë fazë, qoftë me parandalimin e fenomenit të mungesës së ujit të pijshëm, qoftë në angazhimin për të informuar në kohë, për të treguar në kohë dhe për të fikur në kohë zjarret”, pohoi Shemsi Prençi, drejtor i Emergjencave Civile.
Në 30 qershor u shënuan numri më i lartë i zjarreve rreth 16 vatra të tilla, ndërsa qarqet më të prekura janë Fieri dhe Dibra.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.