Sjelljet që duhet të shmangni në mbrëmjen e punës për festat e fundvitit

Ne të gjithë kemi zakone të këqija, disa ndoshta bëjnë thashetheme, disa të tjerëve u mungon saktësia, e të tjerë kanë zakon që të flasin më shumë seç duhet por si një punonjës ndonjëherë këto zakone mund t’ju kushtojnë dhe punën tuaj. Në rastin e festave të fundvitit nuk janë këto sjellje kryesoret që duhet të shmangni, por disa të tjera të cilat do t’ju kushtonin vërtet shumë në përshtypjen që do të krijonit. Hidhini një sy listës së mëposhtme.

1. Veshje e papërshtatshme

Edhe pse festa nuk zhvillohet në orar të punës, kjo nuk do të thotë se ju mund të visheni sikur po shkoni në një klub nate. Ju duhet të visheni në atë mënyrë që tregon se jeni në një rast të veçantë por që gjithsesi mbart seriozitet në vetvete.

2. Mos pini më shumë se sa mbani

Ky është një rregull i rëndësishëm, por shumë njerëz nuk e zbatojnë atë. Ju duhet të pini, por deri në atë fazë sa e dini se ç’po bëni. Mënyra më e mirë për ta bërë këtë, është të vendosni një kufi për veten tuaj përpara se të shkoni në festë e t’i qëndroni besnik asaj.

3. Mos u largoni përpara gjithë të tjerëve

Natyrisht dikush do të jetë gjithmonë i pari që largohet por kjo duhet të ndodhë pasi festa është konsumuar disi dhe nuk ka asnjë problem nëse njerëzit fillojnë të shpërndahen.

4. Përpiquni të kërceni e të bëheni pjesë e organizimit

Kini kujdes me gjuhën tuaj të trupit. Nëse dukeni të mërzitur apo lini përshtypjen se nuk do të donit të ishit aty atëherë më mirë të mos kishit shkuar. Për aq kohë sa jeni në festë tregoni që jeni festiv e të gëzuar.

5. Mos u tregoni antisocial

Edhe nëse i përçmoni kolegët tuaj, mund të jetë koha ta shikoni me një sy tjetër situatën. Gjithashtu nëse jeni i ri në punën tuaj është pikërisht momenti që të njihni disa njerëz e të miqësoheni me ta. Mos u ulni në një cep e të rrini me telefonin tuaj gjithë kohën. Ky do të ishte gabimi më i madh q mund të bëni.

6. Mos flisni për punën dhe problemet e zyrës

Kur shkoni në një festë me kolegët tuaj, rregulli i artë është të mos flisni aspak për punën. Ndonjëherë pa kuptuar këto biseda ju zhysin edhe më thellë në monotoni e nuk ju lejojnë të shijoni asnjë moment të mbrëmjes.

7. Mos u merrni me thashetheme për kolegët aty pranë

Mund t’ju duket qesharake por ndonjëherë këto thashethemet e vogla janë ato që ju fusin në telashe. Përpiquni të qëndroni sa më korrekt e të mos diskutoni për veshjet apo sjelljet e kolegëve të tjerë. Kini kujdes në raste të tilla dikush gabimisht gjithmonë ju dëgjon.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.