Skandali i “Cambridge Analytica” – Pranon influencën në zgjedhjet në SHBA, Facebook në mbikqyrje
Kreu i kompanisë së analizës së të dhënave Cambridge Analytica, Alexander Nix, tha se firma ka luajtur një rol vendimtar në fitoren e Donald Trump në zgjedhjet e vitit 2016.
Komentet e tij shtojnë problemet për gjigantin e medias sociale, Facebook, ndërkohë që përballet me mbikëqyrje në SHBA dhe Europë, pasi i ka ofruar kësaj firme akses në të dhënat personale të 50 milionë përdoruesve, për të shënjestruar votuesit.
Vlera në treg e Facebook ka rënë ndjeshëm në 2 sesionet e kaluara tregtare, ndërkohë që investitorët u shqetësuan se kjo përfshirje do të dëmtojë reputacionin, largojë reklamuesit dhe shtuar rregulloret.
Gjiganti i medias sociale ka humbur mbi 60 miliardë dollarë në vlerë tregu në vetëm dy ditë, shifër më e madhe se kapitalizimi i tregut të Tesla dhe 3 herë më e madhe se Snapchat.
Në programin e firmës britanike përfshiheshin praktika që influenconin zgjedhjet jashtë vendit dhe sipas kreut të kësaj firme, janë bërë kërkime, analiza dhe shënjestrime të votuesve për fushatat televizive dhe dixhitale të Trump.
Ai shton se ka takuar Trump disa herë kur ishte kandidat. Cambridge Analytica ka mohuar të gjitha akuzat dhe shton se i ka fshirë të gjithë të dhënat pasi u bind se informacioni nuk përputhet me rregullat e mbrojtjes së të dhënave.
Ligjvënësit amerikanë dhe europianë kanë kërkuar shpjegim se si firma britanike ka fituar akses në të dhënat e përdoruesve dhe pse Facebook nuk njoftoi përdoruesit, duke ngritur kështu dyshime mbi privatësinë e konsumatorit.
Facebook u lajmërua nga Komisioni Federal mbi Tregtinë, që është rregullatori kryesor i konsumatorit amerikan, se do t’i përgjigjet pyetjeve mbi të dhënat e blera nga Cambridge Analytica.
Nëse Komisioni zbulon se Facebook ka thyer rregullat e privatësisë, ka fuqinë për t’i vendosur gjobë në miliarda dollarë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.