Skanerat në polici – Mirëmbajtja teknike do të kushtojë mbi 18 milionë lekë

Mirëmbajtja e teknike e pajisjeve elektronike në policinë e shtetit do të kushtojë 18 milionë e 35 mijë lekë. Pajisjet për mirëmbajtjen e të cilave kërkohet një kontratë nga ana e drejtorisë së përgjithshme pranë këtij institucioni janë live skanera të tipit DS 45.

Drejtoria e përgjithshme e policisë së shtetit tashmë ka hapur tenderin duke përcaktuar si vlerë të fondit limit, në njoftimin e bërë publik në faqen e Agjencisë së Prokurimit Publik, shifrën mbi 18 milionë e 35 mijë lekësh.

Sipas njoftimeve të kontratës së shpallur tashmë, është përcaktuar si afat kohor për dorëzimin e ofertave ose kërkesave për pjesëmarrje data 28 mars e këtij viti. Ndërkohë që e njëjta datë është përcaktuar për hapjen e ofertave.

Pajisjet të tipit live skanera DS 45 për të cilat kërkohet një kontratë nga ana e drejtorisë së përgjithshme të policisë së shtetit, për mirëmbajtjen teknike, përdoren kryesisht nga policia shkencore për identifikime të ndryshme përmes gjurmës së gishtave. Kohëzgjatja e kontratës është 11 muaj nga moment i lidhjes.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.