Skema e pensioneve në “ditë të mira” – Kontributet e të punësuarve, 74 milionë euro më shumë se para pandemisë

Tregu i punës ka nisur vrullshëm të rigjallërohet pas një goditjes që mori vitin e kalur nga pandemia COVID19 ku qindra qytetarë humbën vendet e punës dhe u trajtuan me pagën e luftës. Të dhënat zyrtare nga financiat, tregojnë se në 9-mujor, të ardhurat e mbledhura nga kontributet për sigurimet shoqërore dhe shëndetësore  u realizuan në masën  81.2 miliardë lekë, me një rritje prej 10 miliardë lekësh krahasuar me  9-mujorin 2020, si dhe tejkalim të planit për këtë periudhë.

Po tregues edhe më shpresëdhënës është rritja me afro 9 miliardë lekë apo 74 milionë euro në raport me periudhën e parakrizës, që tregon shpresë edhe për shëndoshjen e skemës së pensioneve, e cila merr një subvencion të konsiderushëm buxhetor çdo vit.

Duket se ndikim ka dhënë riintegrimi i qytetarëve në tregun e punës gjatë këtij vitit, ku pasojat e COVID mbi bizneset janë zbehur për shkak të hapjes së ekonomisë, si dhe sezoni turistik, ku numri i të punësuarve sezonale është rritur për shkak të nevojës së përballimit të fluksit të pushuesve. Duhet thënë se një pjesë e mirë e qytetarëve shqiptarë, por edhe të huaj zgjodhën Shqipërinë për të pushuar, për shkak se nuk u aplikuan masa anticovid gjatë sezonit veror, ndërkohë që shtetet e tjera, përveç Malit të Zi,  kishin rrëgulla më strikte.

Po ashtu ndikim ka dhënë edhe rritja e pagës mesatare në shkallë vendi dhe e asaj minimale në 30 mijë lekë që nga Janari i këtij viti, çka ka sjellë edhe rritje të masës së kontirbutit që të punësuarit derdhin në arkën e shtetit për pensionet dhe shëndetësinë.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.