Skema, si modifikoheshin makinat e luksit për të mos paguar taksën! Ndryshon ligji, nga 1 janari përfshihen edhe automjetet 6+1
Duke nisur nga viti i ardhshëm, taksën e automjeteve të luksit do ta paguajnë edhe ata që kanë automjetet me kapacitet 6+1. Vendimi vjen si korrigjim i një parashikimi ligjore, që ka rezultuar se ka krijuar shteg për evazion fiskal.
Në ligjin ekzistues parashikohet se automjetet 4+1 që kanë cilindratë më të madhe se 3000 cm3 dhe një vlerë mbi 5 milion lekë do t’i nënshtroheshin taksës. Por referuar relacionit të ligjit që vjen si pjesë e paketës fiskale, pronarët e automjeteve luksoze i modifikonin automjetet duke përdorur sediljet e vogla ose duke i shtuar ato (te fuoristradat) duke bërë që automjeti i tyre të figuronte si 6+1 dhe si rrjedhojë të mos prekej nga parashikimi ligjor. Një ndryshim i tillë, sipas Drejtorisë së Përgjithshme të Transportit Rrugor, ka mundësuar që në 909 raste të bëhej një regjistrim i tillë, çka ka sjellë një dëm prej 19 milion lekësh për arkën e shtetit, raporton portali ekonomik SCAN.
“Ky propozim ka ardhur nga DPTSHRR në cilësinë e agjentit që mbledh taksën e regjistrimi fillestar dhe taksën e përvitshme për automjetet luksoze. Ky institucion ka përcjellë shqetësimin lidhur me kërkesën e pronarëve të mjeteve për të bërë ndryshim konstruktiv të mjeteve të cilët kanë cilindratë më të madhe më të madhe se 3000 cm3; ose vlerën/çmimin të barabartë ose më shumë se 5 000 000 lekë, lidhur me numrin e vendeve duke kërkuar uljen nga 4+1 në 6+1. Kjo kërkesë bëhet me qëllim shmangien e kësaj takse. Sipas DPTSHRR, janë rreth 909 autovetura te regjistruara aktualisht me kapacitet 6+1 të cilat i janë nënshtruar modifikimeve për arësye të evitimit të kësaj takse. Efekti negativ në buxhetin e shtetit është 19.000.000 lekë nga mostaksimi i këtyre automjeteve të cilat duhet të konsiderohen makina luksi. Për këtë qëllim propozohet me anë të këtij ligji rritja e kapacitetit të vendeve nga 4+1 në 6+1” shkruhet në relacionin e nismës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.