Skemat mbështetëse në zonën e Kukësit – Peleshi: Prioritet thertoret, agroturzimi dhe pikat e grumbullimit të qumështit

Kryeministri Edi Rama dhe ministri i Bujqësisë dhe Zhvillimit Rural, Niko Peleshi të shoqëruar nga kryetari Bashkisë Kukës, Bashkim Shehu kanë prezantuar nismat e reja të qeverisë në lidhje me skemat e mbështetjes në sektorin e bujqësisë dhe blegtorisë gjatë një dreke pune me fermerët e kësaj zone.

Sa i takon zonës së Kukësit, është parashikuar që të mbështeten thertoret e reja në mënyrë që të arrijnë standardet europiane si dhe pikat e grumbullimit të qumështit, ku sipas Peleshit, do të jepen 100 lekë subvencion për një litër qumësht të prodhuar të cilësisë së parë.

Ndërkohë, nga qeveria prioritet të veçantë qeveria ka edhe agroturizmi, ku zona e Kukësit përfaqësohet nga katër fshatra si pjesë e programit “100 fshatrat.”

 “Në gjithë qarkun e Kukësit kemi katër fshatra, Shishtaveci, Shtiqni, Valbona dhe Cahani, pra katër fshatra, pjesë e skemës së “100 fshatrave” ku ne mbështesim me prioritet strukturat e agroturizmit. Kemi bërë një standard, ku nëse ndërtohet një strukturë akomoduese me të paktën 6 dhoma dhe e shoqëruar me një fermë, merr statusin e agorturizmit dhe pastaj mbështetja nga AZHBR është e konsiderueshme”, u shpreh ministri Peleshi.

Po ashtu, Peleshi vuri theksin edhe te bashkimi i fermerëve, gjë e cila sipas tij u sjell atyre përfitime më të mëdha. Ndërkohë, kryeministri Rama duke ritheksuar nevojën e bashkimit të fermerëve, tha se financiarisht do të mbështeten vetëm kulturat e studiuara si me potencial të madh eksporti.

Duke u ndalur te thertoret, Rama kërkoi edhe mbështetjen e bashkive të cilat sipas tij kanë një rol të rëndësishëm në ndërtimin e tyre në standardet e duhura.

Ndërkohë, kryetari i Bashkisë së Kukësit, .. Shehu u ndal edhe te reforma e ujit, sipas të cilit ujitja në fshat duhet të ketë sahat. Për këtë të fundit, ai tha se ka gati një projekt i ngjashëm me atë të fshatrave të Kosovës dhe Turqisë, të cilat aplikojnë të njëjtën metodë për ujitjen e tokave bujqësore.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.