Skenar i ri për BQE – Fund “bazookës” këtë vit, rritje e normave vitin e ardhshëm
Stafi i Bankës Qendrore Europiane i ofroi politikëbërësve të bankës gjatë takimit të kësaj jave një skenar ku normat e interesit do të rriten diku nga mesi i vitit të ardhshëm, pasi të ketë përfunduar programi i lehtësimit sasior në shkallë të gjerë në fund të këtij viti, thonë burime pranë Reuters.
Kjo hipotezë e hedhur nga stafi i bankës është pritur me optimizëm nga politikbërësit, sidomos nga përfaqësuesit e vendeve më të pasura të Eurozonës e që i takojnë Veriut të kontinentit.
Përfaqësuesit e ekonomive të jugut të Europës ndërkohë janë treguar më të matur me një seknar të tillë.
Këta të fundit i shqetësohen së tepërmi efektit që do të prodhojnë kostot më të larta të kreditimit si dhe forcimi i euros në ekonomitë e vendeve të tyre, që në pjesën dërrmuse vuajnë borxhin masiv dhe papunësinë kronike.
Gjithsesi, këto mbeten vetëm hipoteza dhe nuk ka asnjë angazhim për një politikë të tillë të Bankës Qendrore Europiane brenda kësaj kornize kohore.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.