Sky merr 2 oferta në 1 ditë – Comcast ofron 14.75 paund për aksion, menjëherë pas rritjes nga Fox
Vlera në treg e Sky është rritur bindshëm këtë javë, ndërkohë që Comcast prezantoi një ofertë prej 34 miliardë dollarë, pak orë pasi Rupert Murdoch rriti ofertën e tij. Comcast deklaroi se ka fituar mbështetjen e drejtorëve të pavarur të Sky me një ofertë prej 14.75 paund për aksion, që u prezantua në të njëtën ditë që 21st Century Fox ofroi 14 paund.
Shpejtësia në të cilën Comcast u rikthye me një ofertë më të lartë tregoi vendosmërinë e Brian Roberts për të blerë grupin britanik, që i shërben 23 milionë shtëpive në të gjithë Europën. Aksionet e Sky u rritën me 3% në 15.38 paund, duke e çuar vlerën totale në treg të kompanisë në 26.6 miliardë paund, apo 35 miliardë dollarë, ndërkohë që investitorët kanë vënë bast se beteja e ofertave nuk ka përfunduar ende. Që kur Fox bëri ofertën e parë në vitin 2016, aksionet e Sky janë rritur me 95%, ndërkohë që vetëm vitin e kaluar kanë treguar rritje me 55%.
Beteja për televizionin kryesor me pagesë në Britani është pjesë e një lufte në industrinë e zbavitjes, ndërkohë që gjigantët mediatikë kanë shpenzuar miliarda dollarë për të konkurruar me Netflix dhe Amazon. Comcast dhe Walt Disney, ndodhen në një betejë tjetër për të blerë aktivet e Fox prej 70 miliardë dollarë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.