Societe Generale në Gjermani – Blen biznesin e aksioneve dhe lëndëve të para të Commerzbank
Banka franceze Societe Generale, deklaroi këtë javë se do të blejë biznesin e tregtimit të aksioneve dhe lëndëve të para të Commerzbank, duke fuqizuar prezencën në fusha të tilla si produktet derivate.
Të dy bankat nuk kanë shpalosur një vlerë për transaksionin, pavarësisht se Commerzbank bëri të ditur se kjo njësi gjeneroi të ardhura bruto në 2017-ën prej 381 milionë euro.
Commerzbank, e zotëruar ende pjesërisht nga qeveria gjermane, ka ndërmarrë ristrukturime ndërkohë që shumë pjesë të biznesit kanë hasur vështirësi prej performancës së dobët në tregje dhe kërkesës së ulët për kredi.
Societe Generale deklaroi se blerja do t’i japë nxitje njësisë së quajtur Lyxor, që ka prezencë të fortë në fushën e fondeve të listuara në burisë (ETFs) dhe rrisë profilin e përgjithshëm në Gjermani, që është ekonomia më e madhe e Eurozonës.
Bankingu i investimeve i bankës franceze ka hasur presione pas largimit të ish kreut Didier Valet, gjatë një hetimi për ndryshimin artificial të normës së Liborit.
“Kjo blerje do të jetë transformuese për aktivitetet tona në Gjermani, pasi do t’i ofronte një tjetër përmasë Societe Generale në ekonominë më të madhe të Eurozonës”, deklaroi banka.
Shitja është në linjë me “strategjinë 4.0” të bankës gjermane, që përfshin shitjen e aktiveve jo-bazë për të rritur kapital për biznesin kryesor të bankës.
Rivali kryesor i Commerzbank. Deutsche Bank, ka hasur gjithashtu probleme së fundmi, ndërkohë që dështoi në provën rregullatore në SHBA. Societe Generale bëri të ditur se pret miratim rregullator në gjysmën e dytë të 2018-ës.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.