Solidariteti në Eurozonë – Merkel: Nuk duhet të nxisë krijimin e një unioni të borxhit
Kancelarja gjermane Angela Merkel hodhi poshtë idenë e lehtësimit të borxhit për Italinë, duke thënë se parimi i solidaritetit mes vendeve anëtare të Eurozonës nuk duhet të kthejë bllokun e valutës në një union të ndarjes së borxhit.
Merkel i dha komentet në përgjigje të kërkesës së partive populiste në Itali ndaj Bankës Qendrore Europiane, për të falur 250 miliardë euro borxh. Ajo tha se solidariteti mes vendeve anëtare të euros është i rëndësishëm, megjithatë, kjo nuk duhet të nxisë krijimin e një unioni të borxhit.
Koalicioni qeverisës në Itali mes 2 partive që kanë qasje armiqësore ndaj euros, morën pushtetin ditën e Premte, duke qetësuar tregjet që ishin trazuar nga mundësia e zgjedhjeve të reja. Këto të fundit, pritet të ktheheshin në një referendum për qëndrimin në euro.
“Unë do të përpiqem që të zhvilloj hapur biseda me qeverinë e re italiane, në vend që të spekulojë për qëllimet që ka”, tha Merkel.
Kancelarja konservatore foli edhe mbi idetë e presidentit francez Emmanuel Macron, për të kthyer fondin e shpëtimit të Eurozonës, në një Fond Monetar Europian, që do të veprojë si mbrojtës ndaj krizave të ardhshme të bllokut. Ajo tha se fondi i shpëtimit të Eurozonës nuk ka mjaftueshëm kapacitet për të mbrojtur bllokun ndaj krizave. Nga ana tjetër, ky fond mund t’i japë vendeve anëtare me probleme të borxhit sovran, linja të kredit, sipas Merkel. “Nëse e gjithë Eurozona është ne rrezik, Fondi Monetar Europian duhet të jetë në gjendje që të ofrojë linja afat-gjatë të kreditit, që do të kenë kusht reformat strukturore”, tha ajo.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.