Sot nisin punimet/Segmenti rrugor Vorë-Fushë Krujë i bllokuar për 45 ditë, devijohet trafiku
Këtë të enjte ka nisur puna për rehabilitimin e segmentit rrugor Vorë-Kthesa Rinas – Fushë Krujë.
“Autoriteti Rrugor Shqiptar dhe Policia e Qarkullimit Rrugor informojnë median dhe opinionin publik se duke nisur nga dita e enjte (datë 13 Shtator 2018), në kuadër të projektit të mirëmbajtjes me performance të Bankës Botërore, do të fillojnë punimet për rehabilitimin e aksit Vorë – Kthesa Rinas – Fushë Krujë”, njofton ARRSH.
Punimet kryesore të cilat janë parashikuar gjatë fazës së rehabilitimit të këtij aksi rrugor janë prishja e shtresave ekzistuese asfaltike; zëvendësimi i nënshtresave në çakëll dhe stabilizant; realizimi i të gjitha shtresave të reja asfaltike në të gjithë gjatësinë e rrugës dhe vendosja e sinjalistikës rrugore dhe e masave të sigurisë rrugore.
Nga sot është bërë bllokimi i aksit nga Kthesa e Doganës së Tiranës deri tek kthesa për Prezë.
Kohëzgjatja e punimeve për rehabilitimin e segmentit nga Kthesa e Doganës së Tiranës deri tek kthesa për Prezë është 45 ditë.
Ky segment do të jetë i bllokuar për të gjitha mjetet gjatë periudhës se kryerjes së punimeve.
Dogana e Tiranës do të jetë e aksesueshme nga ana e Vorës.
Devijimi i trafikut do të jetë sipas sinjalistikës provizore të vendosur në segmentin ku do të punohet si dhe udhëzimet e policisë.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.