S&P sheh rreziqe për Britaninë – Thekson nevojat e mëdha të financimit, për një zhvlerësim të mundshëm
Agjencia e vlerësimit të kreditit Standard & Poor’s bëri të ditur se vendimi i Britanisë për të dalë nga Bashkimi Europian ka shtuar rrezikun mbi nevojat e mëdha të huamarrjes së vendit.
Agjencia, në një deklaratë pas konfirmimit të mundësisë së një zhvlerësimi tjetër të borxhit sovran, tregoi se nevojat e financimit të jashtëm bruto të Mbretërisë së Bashkuar, janë më të lartat në 131 vende të vlerësuara nga Standard & Poor’s.
“Pavarësisht projeksioneve tona për një tkurrje të lehtë të defiçitit të llogarisë korrente, ne mendojnë ende se defiçitet e mëdha të jashtme të Mbretërisë së Bashkuar përbëjnë një cënueshmëri. Ne e shohim shkëputjen nga Bashkimi Europian si një rrezik ndaj burimeve të financimit”, deklaroi agjencia.
Sipas Standard & Poor’s, Brexit do të vazhdojë të përbëjë çështje politike mbi unitetin e Mbretërisë së Bashkuar, veçanërisht nëse sjell një referendum të dytë të pavarësisë në Skoci apo nëse rrit tensionet me Irlandën e Veriut.
S&P uli vlerësimin prej AAA të Britanisë, më i larti i mundshëm, në AA pas referendumit për daljen nga Bashkimi Europian, duke thënë se kapaciteti i vendit për politikëbërje efektive dhe të qëndrueshme është zbehur.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.