SPAK, bilanci i punës për një vit – 343 procedime penale të regjistruara, 158 për korrupsion, 42 për krimin e organizuar
Ngarkesë shumë e madhe me dosje e pak çështje të dërguara në gjykatë. Është ky bilanci i punës së Strukturës së Posaçme Kundër Korrupsionit e Krimit të Organizuar për vitin 2020. Qendra për Studimin e Demokracisë dhe Qeverisjes ka përmbledhur në një Raport Vlerësimi Veprimtarinë e SPAK dhe Gjykatave të Posaçme për Korrupsionin dhe Krimin e Organizuar 2020.
Rreth 10% e procedimeve penale në total të hetuara nga SPAK është dërguar për gjykim në Gjykatën e Posaçme të Shkallës së Parë për Korrupsionin dhe Krimin e Organizuar dhe rreth 31% e numrit total të të pandehurve është dërguar për gjykim në këtë gjykatë.
Me fillimin e veprimtarisë në 19 dhjetor 2019, në Prokurorinë e Posaçme kundër Korrupsionit dhe Krimit të Organizuar u regjistruan në total 225 procedime penale me 271 persona në hetim, pjesën më të madhe të të cilave e përbënin procedime penale të ardhura nga ish- Prokuroria e Krimeve të Rënda (204) dhe pjesën tjetër e përbënin procedime penale të ardhura nga Prokuroritë e Rretheve Gjyqësore si dhe procedime të kthyera për hetim nga Gjykata e Posaçme e Shkallë së Parë për Korrupsionin dhe Krimin e Organizuar (21).
Procedimet penale të lidhura me krimin e organizuar (120) përbënin gjithashtu numrin më të lartë të procedimeve penale të regjistruara gjatë kësaj periudhe krahasur me procedimet penale për korrupsionin (82).
Ky raport i llojit të procedimeve penale përmbyset dukshëm në numrin e procedimeve të reja të regjistruara në Prokurorinë e Posaçme kundër Korrupsionit dhe Krimit të Organizuar gjatë vitit 2020.
Nga 343 procedime penale të regjistruara në total gjatë kësaj periudhe, 158 i përkasin procedimeve penale të korrupsionit, ndërkohë që vetëm 42 lidhen me krimin e organizuar. Gjatë kësaj periudhe vërehet edhe një rritje e konsiderueshme e numrit të procedimeve të tjera penale (143) krahasur me numrin e tyre regjistruar gjatë muajit dhjetor 2019 (23).
Për periudhën e mbetur të vitit 2020, në Gjykatën e Posaçme të Shkallës së Parë për Korrupsionin dhe Krimin e Organizuar janë regjistruar edhe 8 procedime penale në fushën e korrupsionit.
Nga 162 procedime të hetuara në total për veprat penale që lidhen me krimin e organizuar vetëm 16 prej tyre janë dërguar për gjykim.30 Nga 240 procedime penale të hetuara për vepra penale të lidhura me korrupsionin vetëm 39 janë dërguar për gjykim. Raporti paraqitet mjaft i ulët edhe sa i takon numrit të procedimeve të lidhura me vepra të tjera penale, ku nga 166 të tilla të hetuara, vetëm 4 prej tyre janë dërguar për gjykim.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.