SPAK heton tenderat sekretë/ Ministria e Shëndetësisë: Ju kthyem përgjigje. PD: dosjet u dogjën nga zjarri në zyrën e prokurorimeve
Ndërsa SPAK ka ridërguar kërkesën për informacion lidhur me tenderat sekretë të zhvilluar gjatë periudhës së Pandemisë, Ministria e Shëndetësisë thotë se ka dërguar pranë Prokurorisë së Posaçme informacionin e kërkuar dhe se dosjet janë në dritë të diellit.
Ministria e Shëndetësisë bën me dije se më datë 8 Maj 2020 është firmosur shkresa përcjellëse me dokumentacionin e të gjitha procedurave të kërkuara nga Prokuroria e Posaçme Antikorrupsion, ndërkohë që prej 27 prillit këto dokumente po verifikohen edhe nga Kontrolli i Lartë i Shtetit.
“E vërteta është se asgjë nuk është fshehur dhe dosjet janë në dritën e diellit. Që prej datës 27 Prill, në Ministrinë e Shëndetësisë po vijon punën Kontrolli i Lartë i Shtetit, për të gjitha procedurat e zhvilluara në situatën e pandemisë, për mjetet e nevojshme për mbrojtjen e stafeve mjekësore dhe aparaturat jetëshpëtuese për pacientët e prekur nga COVID19.” thuhet në deklaratën e ministrisë së Shëndetësisë.
Ndërkaq, ditën e diel, ka pasur edhe një reagim të Partisë Demokratike, sipas së cilës dokumentet e tenderave sekretë janë djegur përmes një zjarri të rënë në ambientet e zyrës së prokurimeve publike
SPAK të premten ka ridërguar sërish një shkresë në ministrinë e shëndetësisë për marrje informacioni për tenderat sekret, pasi nuk kanë marrë përgjigje. Në lidhje me këtë ka ardhur edhe një reagim nga ministria e Shëndetësisë ku thuhet se janë të hapur për organet e drejtësisë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.