SPAK konfiskon pasuritë e Balilajve. Gjykata kalon në pronësi të shtetit 40% të Santa Quaranta-s, troje e 16 apartamente
Nga hoteli Santa Quaranta, mijëra metra troje, dyqane e apartamente, janë miliona euro pasuri që SPAK I ka konfiskuar Kelmend Balilit, I dënuar vitin e shkuar me 10 vite heqje lirie për trafikim lëndësh narkotike. Përmes një njoftimi zyrtar, SPAK ka bërë me dije se Gjykata e Posaçme Kundër Korrupsionit e Krimit të Organizuar ka pranuar kërkesën për konfiskimin dhe kalimin nën pronësi të shteti të 40% të pronave të vëllezërve Balili.
“Prokuroria e Posaçme kundër Korrupsionit dhe Krimit të Organizuar, bazuar në përcaktimet e ligjit nr.10192 datë 03.12.2009 “Për parandalimin dhe goditjen e krimit të organizuar, trafikimit dhe korrupsionit nëpërmjet masave parandaluese kundër pasurive”, (i ndryshuar), ka kryer hetim financiar mbi pasuritë e shtetasve Kelmend dhe Bashkim Balili, si dhe të shoqërisë “Balili & Co” shpk.
Në përfundim të shqyrtimit gjyqësor, pas kërkesës për konfiskim të paraqitur nga Prokuroria e Posaçme për konfiskim, Gjykata e Posaçme e Shkallës së Parë për Korrupsionin dhe Krimin e Organizuar, me vendimin Nr.18, datë 21.09.2020, vendosi Konfiskimin dhe kalimin në favor të shtetit në pjesë ideale 40% të pasurive si më poshtë”, thekson SPAK duke renditur rreth 30 pasuri të paluajtshme të Balilit:
⦁ Truall me sipërfaqe 11.994 m2, ndodhur në qytetin e Sarandës në emër të “Balili % CO” shpk.
⦁ Objekti “Ish – Kampi i Pushimit të Punëtorëve, tashmë Santa Quaranta 4 + 1 kate, me sipërfaqe ndërtimi 1923 m2 dhe sipërfaqe trualli 13.000 m2, ndodhur në qytetin e Sarandës në emër të “Balili % Co” shpk.
⦁ Truall me sipërfaqe 1716.91 m2, ndodhur në qytetin e Sarandës në emër të “Balili % Co” shpk.
Më tej lista vazhdon me 16 apartamente dhe një dyqan, që sipas ligjit, për administrimin dhe përdorimin e pronave të konfiskuara gjykata ka ngarkuar Agjencinë për Administrimin e Pasurive të Sekuestruara dhe të Konfiskuara, Tiranë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.