SPAK rihap dosjen e Gërdecit – Kërkesë Gjykatës së Lartë për revokimin e vendimit që pushoi hetimin ndaj Fatmir Mediut
Prokuroria e Posaçme Antikorrupsion i ka kërkuar Gjykatës së Lartë të lejojë rinisjen e hetimit ndaj ish Ministrit të Mbrojtjes Fatmir Mediu për çështjen e Gërdecit, i pushuar në vitin 2009 nga Kolegji Penal i saj për shkak të imunitetit parlamentar. SPAK argumenton në kërkesë se kufizimi për hetimin e zyrtarëve të lartë nuk ekziston më, duke mos përbërë më pengesë për hetimin e ish ministrit.
Shkak për rihapjen e hetimit është kërkesa e shtetasve Feruzan Durdaj dhe Zamira Durdaj, trashëgimtarë të viktimës E.D., i cili ka humbur jetën në moshën 7 vjeç, me objekt ndjekjen penale të shtetasit Fatmir Mediu, ish Ministër i Mbrojtjes së Shqipërisë.
SPAK argumenton përmes një njoftimi zyrtar se Shkaku ligjor për të cilin Kolegji Penal i Gjykatës së Lartë me vendimin nr.6, datë 14.09.2009 ka vendosur pushimin e çështjes penale ndaj shtetasit Fatmir Mediu, ekzistenca e imunitetit parlamentar ndaj ushtrimit të ndjekjes penale, nuk ekziston më në legjislacionin procedural penal.
Prokuroria e Posaçme vlerëson se ndjekja penale për çështjen penale ndaj shtetasit Fatmir Mediu nuk ka asnjë pengesë që të vazhdojë, pengesa e autorizimit për procedim ka qenë e përkohshme në momentin kur është vendosur pushimi i çështjes, ndërsa tani kjo pengesë nuk ekziston.
Si rezultat i ngjarjes së rëndë ndodhur në Gërdec në vitin 2008 u shkaktua vdekja e 26 personave, plagosja e rëndë e 27 personave, plagosja e lehtë e 109 personave, dëmtime të parëndësishme për 67 persona, si dhe dëmtime të tjera të paklasifikuara të 61 personave që janë trajtuar në spitale e qendra shëndetësore. Po kështu, kjo ngjarje solli pasoja dhe dëmtime të pasurive të ndryshme në total në vlerën 2.2 miliardë, duke përfshirë pasuri të shtetasve dhe pasuri shtetërore e publike.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.