Spanja kërcënon Brexit – Kërkon ndryshime në marrëveshje për territorin e Gjibraltarit

Negociatorët e Bashkimit Europian janë takuar këtë të Premte për të zgjidhur mospërputhjet e fundit mbi Brexit përpara ditës së Diel, ku pritet edhe të nënshkruhet marrëveshja. Megjithatë, kundërshtimi i Spanjës përgjatë të gjithë takimit mbi territorin e Gjibraltarit,  nënkupton se dokumenti përfundimtar mund të mos jetë ende gati.

Ndërkohë që 4 muaj kanë mbetur përpara se Britania të dalë nga Bashkimi Europian, traktati ligjor i “divorcit” dhe deklarata politike për marrëdhëniet e ardhshme po përgatiten që të vulosen nga Kryeministrja Theresa May dhe liderët e 27 vendeve të mbetura në BE.

Spanja ka kërkuar ndryshime të traktatit  dhe deklaratës për marrëdhëniet mes 2 palëve, për të qartësuar se vendimet për territorin britanik të Gjibraltarit do të ndërmerren vetëm nëpërmjet bisedimeve direkte me Madridin.

Nga ana tjetër, Shefi i Ekzekutivit të Gjibraltarit, Fabian Picardo, tha se ka bashkëpunuar për të arritur një darkodësi me kolegët spanjoll dhe shtoi se nëse marrëveshja e Brexit  hapet për një presje mbi Gjibraltarin,  do të rihapet përsëri për çështje të tjera.

“Pa i’u nënshtruar kërcënimeve, sfidave të konsiderueshme, pretendimeve se Brexit i ka dhënë Spanjës mundësinë më të mirë në 300 vite për të pasur sovranitet mbi Gjibraltarin, Gjibraltari, pavarësisht këtyre, do të jetë pjesë e çdo marrëveshjeje të divorcit, nëse do të ketë”. 

Ministri spanjoll, Pedro Sanchez, tha një ditë më parë se Spanja do të jetë kundër projekt marrëveshjes për daljen e Britanisë nga Bashkimi Europian, nëse nuk ka ndryshime. “Qeveria ime do të mbrojë interesat e Spanjës. Nëse nuk ka ndryshime ne do të vendosim veton për Brexit”, tha Kryeministri spanjoll.

Nën rregullat e Bashkimit Europian, traktati i divorcit do të miratohet nga një shumicë dhe jo në mënyrë unanime, kështu që një shtet i vetëm nuk mund ta bllokojë. Megjithatë, liderët e Bashkimit Europian, kërkojnë unitet për këtë çështje që ka ndjeshmëri të madhe politike. Faza përfundimtare dhe më e vështira, do të jetë kalimi i paketës së Brexit në parlamentin Britanik.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.