Spanja, më e pasur se Italia – FMN: Një dekadë e stanjacionit e ka lënë vendin pas në PBB për frymë
Spanjollët janë bërë më të pasur se italianët, gjë që është tregues optimist për rimëkëmbjen ekonomike të Spanjës dhe një shenjë shqetësuese për Italinë, ekonominë e tretë më të madhe të Eurozonës, që ndodhet në ngërç politik.
Produkti i Brendshëm Bruto për frymë i Spanjës kaloi atë të Italisë në 2017-ën, sipas të dhënave të Fondit Monetar Ndërkombëtar të publikuara këtë javë që krahason vendet në bazë të paritetit të fuqisë blerëse.
FMN projekton gjithashtu se Spanja do të bëhet 7% më e pasur se Italia në 5 vitet e ardhshme. Një dekadë më parë, Italia ishte 10% më e pasur se Spanja, në bazë të të njëjtit krahasim.
Të dhënat dhe parashikimet tregojnë një ndryshim të mprehtë të këtij statusi, për 2 ekonomitë që kanë marrë goditje të ashpër nga kriza e Eurozonës në dekadën e fundit.
Ndërkohë që Spanja është tashmë një nga ekonomitë me rritjen më të shpejtë në Bashkimin Europian, Italia ka mbetur pas. Në vitin 2023, disa vende ish sovjetike të bllokut, përfshirë Sllovakinë dhe Republikën Çeke, prite të bëhen gjithashtu më të pasura se Italia, bazuar te të ardhurat për frymë.
Sipas FMN, fakti që Spanja ka kaluar Italinë, ka të bëjë më shumë me problemet e vendit se sa me progresin ekonomik të Spanjës, që ka marrë vrull së fundmi.
Ndërsa Spanja është rritur me një normë më të madhe se Franca, Gjermania dhe Mbretëria e Bashkuar që prej vitit 2015, ekonomia e vendit është vetëm 2% sipër fillimit të 2008-ës, që është rimëkëmbja më e dobët krahasuar me të gjithë vendet e BE, përveç Italisë.
Të dhëna të tjera nga OECD, tregojnë se Italia është një ndër ekonomitë e mëdha që nuk ka kaluar ende nivelin e para-krizës, prej popullsisë në plakje, produktivitetit të ulët, burokracive të mëdha dhe borxhin e lartë shtetëror.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.