Spanja merr “kthesën” – Buxheti 2017 i largohet masave shtrënguese

Qeveria e pakicës në Spanjë, pritet të njoftojë shumë shpejt projekt-buxhetin e vitit aktual, që mbetet mjaft i vonuar në kohë për shkak të krizës së rëndë qeveritare që la vendin pa ekzekutiv të zgjedhur për thuajse një vit.

Në buxhetin e ri pritet që të ofrohet një rritje e pagave në sektorin publik, si dhe më shumë shpenzime sociale.

Kjo do të thotë se, vendi më në fund po i largohet masave shtrënguese, duke reflektuar situatën mjaft të mirë ekonomike që po kalon vendi.

Rajoy synon që, në këtë mënyrë të fitojë edhe mbështetjen e opozitës në parlament. Kabineti qeveritar do ta kalojë projekt-buxhetin 8 muaj me vonesë.

Një projeksion më i mirë ekonomik përgjatë 2 muajve të fundit i jep kryeministrit mundësinë që të paraqesë një buxhet më lehtësues.

Gjasat që parlamenti ta votojë projekt-buxhetin tashmë janë tepër të larta, pavarësisht se kryeministri nuk gëzon shumicën parlamentare.

Buxheti përfshin shpenzime në 4.2 miliardë euro në infrastrukturën e rajonit të Katalonjës, që prej kohësh kërkon autonominë, si dhe rritje të pagave në të gjithë Spanjën me 1% në administratën publike.

Ndër të tjera, Rajoy ka rënë dakord të ulë Tatimin mbi Vlerën e Shtuar për biletat e kinemasë apo teatrit.

Në projekt buxhet do të përfshihen edhe 350 mijë kontrata të reja pune për punonjësit e sektorit publik, përfshirë 130 mijë në sektorin shëndetësor. Ekonomia spanjolle projektohet të rritet mbi parashikimet këtë vit, duke tejkaluar kështu normën e 2.5%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.