Spanjë, rekord 8-vjeçar – Papunësia zbret në nivelin më të ulët që prej 2009
Norma e papunësisë në Spanjë ka rënë pranë nivelit më të ulët në 8 vite gjatë Qershorit, tregojnë të dhënat e fundit zyrtare nga vendi. Të papunët kanë rënë me plot 2.84% në vetëm një muaj, ose me rreth 98 mijë persona.
Pavarësisht kësaj, 3.36 milionë njerëz vijojnë të jenë të papunë. Në kulm të krizës 5-vjecare ekonomike, papunësia spanjolle u ngjit pranë rekordit të 27%. Sot, ka zbritur nën 18%, ndërkohë që qeveria projekton një normë pranë 11.1% brenda vitit 2020.
Edhe numri i të punësuarve u rrit lehtë gjatë qershorit, me 0.48%, ose 87 mijë individë. Aktualisht, 19.43 milionë njerëz në Spanjë kanë një punë. Rënia më e madhe e papunësisë u regjistrua në sektorin e shërbimeve, më i madhi në vend.
Kjo vjen falë sezonit turistik, me hotelet e restorantet që punësojnë një numër rekord njerëzish. Edhe në industri rënia është domethënëse, me 3.18%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.