Spanjollët po rikthehen – Rriten ndjeshëm flukset e të rinjve që kthehen në atdhe
Spanjollët e larguar masivisht nga vendi i tyre gjatë viteve të krizës së rëndë ekonomike janë duke u kthyer në shtëpitë e tyre, e sidomos të rinjtë. Pavarësisht se gjendja e vendit është ende e rënduar në krahasim me periudhën e para krizës, ata po rikthehen, Tashmë norma e papunësisë është në 14.5%, nga 26.9% në vitin 2013, kur edhe kulmoi kriza.
Pagat ndërkohë vijojnë të jenë ende të ulëta në krahasim me para krizën. Psh, paga e një shoferi taksie për 11 orë punë, nuk i tejkalon 850 euro në muaj. Vlerësohet se janë plot 190 mijë spanjollët e larguar si pasojë e krizës financiare që përfshiu të gjithë vendin.
Por, rimëkëmbja në vend po vazhdon me ritme të shpejta, duke i lënë hapësira të mjaftueshme kompanive që të punësojnë sërish. Largimet, por edhe fenomenet shoqërore të krizës kanë bërë që Spanja të përballet edhe me probleme demografike, siç është tkurrja e ndjeshme e forcës punëtore.
Ashtu si pjesa dërrmuese e vendeve europiane, edhe Spanja po vuan nga një mospërputhje e aftësive dhe vendeve të punës. 22% e punëtorëve në Spanjë janë të mbikualifikuar për punën që bëjnë, thotë OECD. Një pjesë e madhe e spanjollëve ndërkohë janë të detyruar të pranojnë vende pune që nuk i`u korrespondon kualifikimit të tyre.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.