Spastrime në Arabinë Saudite – Reagojnë investitorët, tregjet lokale pësojnë rënie

Aksioni anti-korrupsion në Arabinë Saudite, që ka sjellë arrestimin e anëtarëve të familjes mbretërore, ministra e biznesmenë, ka vazhduar ditën e Hënë, pasi themeluesi i një nga kompanive më të mëdha ajrore të mbretërisë, raportohet se është arrestuar.

Indeksi i titujve të kapitalit në Arabinë Saudite ra me 1.1% në hapje të sesionit tregtar, ndërsa kompania e udhëtimeve ajrore Al Tayyar, ra me 10% pas  lajmërimit.   Akuzat kundrejt tyre përfshijnë, pastrim parash, dhënie ryshfeti si dhe shfrytëzimin e postit publik për fitime personale, tregojnë burimet për Reuters.

Për investitorët e huaj, lëvizja më surprizuese ishte arrestimi i miliarderit Alëaleed bin Talal, që ka zotërime në kompani amerikane si Citigroup, Twitter dhe Apple. Aksionet e kompanisë së tij në Arabinë Saudite, Kingdom Holding, patën rënien më të madhe.

Nga ana tjetër, investitorët lokalë, shqetësohen se vazhdimi i hetimit mund të sjellë skandale në botën e biznesit të Arabisë Saudite, gjë që do të detyrojë shitjen e aksioneve.

Megjithatë,  disa analistë thonë se ky spastrim, që përfshin zëvendësimin e kreut të Gardës Kombëtare dhe fuqizimin e pushtetit të princit trashëgimtar, mund të ketë edhe efekte pozitive.

Kjo mund ta bëjë më të lehtë për princin që të ndjekë reformat  radikale që përfshijnë uljen e deficitit buxhetor, nxitjen e punësimit për gratë si dhe shitjen e 300 miliardë dollarë të aktiveve shtetërore.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.