Spital i ri për të përballuar emergjencën. Ministrja Manastirliu jep detajet, kur mund të fillojnë punimet
Në mbledhjen e zhvilluar me kryeministrin Rama, ministrja e Shëndetësisë Ogerta Manastirliu ka treguar detajet për një plan të ri të qeverisë, që ka të bëjë me rehabilitimin e një godine për ta kthyer në një spital për pacientët e sëmurë me COVID-19, por që nuk kanë nevojë për mjekim të specializuar:
“Ne kemi bërë ditën e sotme një vlerësim në një objekt që po e shqyrtojmë,për ta kthyer në një strukturë spitalore bazë, për ata pacientë që nuk do të kenë nevojë për terapi të specializuar, por vetëm për terapi bazë mjekimi. Jemi duke e vlerësuar këtë opsion, kemi bërë një investigim në vendin ku mendojmë që do të jetë ky objekt, që shumë shpejt do t’i shtrohet një rehabilitimi dhe të plotësohet me kushtet e duhura për tu bërë funksional. Ky është nje skenar i afërt, nga shumë skenarët që kemi përgatitur për përballimin e emergjencës.”
Pyetur nga kryeministri Rama për një afat të mundshëm, kur punimet mund të fillojnë, Ministrja e Shëndetësisë është shprehur:
“Po vlerësojmë instrumentat ligjor të nevojshëm dhe po bëjmë një vlerësim ekonomik dhe fizibiliteti, nga pikëpamja që kjo strukturë do ketë me kohën, pra për çfarë do të përdoret në afatgjatë. Brenda një afati 20 ditor mendojmë të kemi filluar punimet për të rehabilituar këtë ndërtesë.” – u shpreh ministrja Manastirliu.
G.K / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.