Spitalet Covid 3 dhe 4, gati për t’u hapur, Rama: “Që kur ka nisur kjo luftë, nuk jemi kapur të papërgatitur”
Kryeministri Edi Rama i shoqëruar edhe nga Ministrja e shëndetësisë, Ogerta Manastirliu është ndalur në strukturën spitalore Covid 3 për të parë nga afër nëse kjo strukturë është gati për tu hapur në rast të vazhdimit të shtimit të numrit të infektimeve me covid-19. Manastirliu theksoi se Covid 3 është gati për tu hapur duke ofruar 150 shtretër, pajisjet e duhura dhe një staf të trajnuar.
“Janë 150 shtretër në këtë strukturë e dedikuar për pacientët me Covid19, ku ka gjithashtu edhe një njësi reanimacioni për pacientët që do të ketë nevojë. Sipas protokollit që ka përcaktuar shërbimi infektiv çdo gjë është vendosur dhe është gati. Janë pajisur dhomat me monitorë, respiratorë dhe linjat e oksigjenit”, tha Manastirliu.
Pas vizitës në këtë spital, Rama shprehet në faqen zyrtare ne Facebook se asnjëherë shteti nuk është kapur i papërgatitur lidhur me luftën kundër covid-19
“Spitalet COVID 3 dhe 4 janë gati dhe asnjëherë, asnjë çast, qyshse ka nisur kjo luftë, nuk jemi kapur të papërgatitur, përkundrazi.
Stafet rezervë janë rekrutuar, janë trajnuar dhe janë në gatishmëri”, shkroi kryeministri.
Sipas mjekëve situata aktualisht është e manaxhueshme dhe spitalet covid 1 dhe 2 kanë ende kapacitete pritëse, ndërkohë që kovid3 në gatishmëri është edhe spitai covid 4 me 100 shtretër.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.