Spitalet rajonale në patronazh – Nga janari asistencë nga QSUT, Trauma dhe “Shefqet Ndroqi”
Nga janari do të nis sistemi i patronazhimit të spitaleve rajonale nga ato universitare. Sipas një programi të miratuar nga Ministria e Shëndetësisë të tre spitalet universitare në Tiranë do të ofrojnë asistencë teknike dhe menaxheriale sipas nevojave që do të kenë spitalet rajonale.
Asistenca teknike konsiston në dhënien e ndihmës nga mjeku specialist i cili do të shkojnë në spitalet rajonale sipas një grafiku të përcaktuar. Ndërkohë që do të ofrohet edhe asistencë menaxheriale në hartimin apo planifikimet financiare për të cilat do të kenë nevojë spitalet përkatëse por gjithmonë nën vëzhgimin e një grupi pune të ngritur për këtë qëllim pranë Ministrisë së Shëndetësisë. Spitali Universitar i Traumës do të ketë në patronazh spitalin e Fierit , të Vlorës dhe të Gjirokastrës.
“Spitali Universitar i Traumës ka në patronazh tre qarqe ose tre spitale të tjera, që është Spitali i Fierit, Spitali i Vlorës dhe Spitali i Gjirokastrës. Patronazhimi do të ketë le të themi dy shtylla kryesore. Shtylla e parë do jetë asistenca teknike ndaj këtyre spitaleve, pra për t’i mbuluar me specialistë të cilët ata nuk kanë mundësi t’i kenë. Nga ana tjetër, do jetë edhe një suport apo mbështetje le të themi nga pikëpamja e organizimit dhe menaxhimit në përgjithësi të Qendrave Shëndetësore dhe spitalet për të cilat ne patronazhojmë. Për çdo problem në menaxhim, në buxhet, në financim që ata kanë, atëherë ne me ekipe të përbashkëta do mundohemi t’i zgjidhim bashkërisht.”
Ndërkohë që edhe Spitali Universitar Nënë Tereza dhe Shefqet Ndroqi do të kenë në patronazh spitale rajonale. Kështu QSUT-ja do të ofrojë asistencë me mjekë specialist në spitalet rajonale të Dibrës, Beratit, Korçës dhe Elbasanit.
Ndërsa spitali Shefqet Ndroqi do të ofrojë ndihmë në spitalin e Shkodrës, të Kukësit dhe të Lezhës. Ky plan do të ndihmojë në eliminimin e radhëve në spitalet universitare dhe do ofrojë shërbim të specializuar mjekësor aty ku janë nevojat e qytetarëve. Në të njëjtën kohë do të ndihmojë dhe në formimin profesional të mjekëve në spitalet rajonale.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.