Spitali i ri i Fierit, Rama: Model për shëndetësinë shqiptare. Erdogan: Bashkëpunimi do të vijojë
Në ceremoninë e hapjes së Spitalit Rajonal të Fierit, kryeministri Edi Rama, deklaroi se ky spital është fillimi i një pune për ta kthyer në vitet në vijim edhe shëndetësinë shqiptare në një histori suksesi.
“Këtu do të punohet përditë për fazën e re të reformës tonë në shëndetësi, që nënkupton jetësimin e autonomisë spitalore dhe zbatimin në praktikë të atij modeli që e ka bërë shëndetësinë në Turqi një sektor ekselence. Kjo fazë e re do t’iu japë fund atyre bishtave që vazhdojnë zgjaten nga e kaluara në shërbimin tonë. Sot ne kemi infrastrukturën të rindërtuar plotësisht, sot kemi shëndetësi të cilës nuk i mungojnë pajisjet dhe as burimet njerëzore, dhe tani modeli i ri i menaxhimit do të na çojë në atë modernizim 360 gradë të sistemit, që do t’i bëjë qytetarët shqiptarë të ndihen krenar kur hyjnë në spitale”, tha Rama.
Gjithashtu, Rama tha se ka rënë dakord me presidentin e Turqisë për të rritur investimet turke në Shqipëri. Ceremonia e përfundimit të punimeve të Spitalit Memorial të Fierit u përshëndet online nga zyra e tij në Ankara, edhe nga presidenti i Turqisë, Recep Taip Erdogan.
“Spitali Rajonal në Fier është investim i rëndësishëm i Turqisë. Spitali ka kushte moderne. Do vazhdojmë t’i shërbejmë Shqipërisë. Uroj që ky spital i miqësisë, të shpërndajë sa më shumë mirësi për vëllezërit shqiptarë”, deklaroi Erdogan.
Kryeministri Rama përftoi nga rasti të njoftojë se me qeverinë turke po punohet edhe për një investim tjetër, i cili do sjellë ekselencën e turizmit në të gjithë bregdetin e Divjakës.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.