Spitali i Shkodrës – Rama dhe Manastirliu inspektojnë investimet
Kryeministri Edi Rama, së bashku me ministren e Shëndetësisë, Ogerta Manastirliu, inspektuan mjediset e Spitalit të Shkodrës. Sipas njoftimit të Kryeministrisë, në këtë spital gjatë tre viteve të fundit janë investuar 5 milionë dollarë.
Veç të tjerash, këto investime kanë mundësuar edhe ofrimin e shërbimeve të reja shëndetësore, si koronarografia, rezonanca magnetike. Kimioterapia dhe protezat ortopedike. Së fundmi, në këtë spital është rindërtuar tërësisht reparti i reanimacionit.
“Reanimacioni i ri, polivalent i spitalit të Shkodrës, ka dyfishuar kapacitetet dhe me pajisje tërësisht të reja. Spitalin e Shkodrës, duke qenë se duam ta kthejmë në qendër referenciale për të gjithë veriun, kemi 3 vite e gjysmë që investojmë intensivisht në shërbime që nuk janë ofruar më parë. Kemi ofruar për herë të parë shërbimin e Hemodinamikës; Kemi hapur Qendrën e Kimioterapisë, një shërbim i ri që nuk ekzistonte më parë; Kemi shërbimin e ri të Dializës; Kemi forcuar edhe shërbimin e Imazherisë me një rezonancë që kryen rreth 3000 diagnostikime në vit; Që do të thotë që ky spital, sot është ndër spitalet, pas QSUT, më të fuqizuarit, me kapacitetet më të ngritura dhe me një staf dhe ekip profesionistësh”, deklaroi Manastirliu.
Gjatë inspektimit të investimeve publike në Qarkun Shkodër, Kryeministri Rama vizitoi edhe pikën turistike të Razmës.
Sipas njoftimit të Kryeministrisë, në fshatin Razmë është ndërtuar një rrugë e re pedonale, janë shembur ndërtimet e paligjshme dhe është bërë sistemit i ujërave nëntokësorë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.