Stabilizohen çmimet e naftës – Investitorët vlerësojnë ndikimin e Omicron. Rriten inventarët në SHBA
Çmimet e naftës janë stabilizuar në tregtinë e ditës së Mërkurë, pasi u rritën me mbi 1% një ditë më parë, ndërkohë që investitorët vlerësuan ndikimin e rasteve gjigante me Omicron, pavarësisht se pozitiviteti qëndroi i limituar prej rritjes së inventarëve të karburantit në SHBA. Nafta brent e Londrës ra me 0.03% në 80.04 dollarë për fuçi, ndërsa nafta bruto amerikane u rrit me 0.03% në 77.01 dollarë për fuçi. Shtetet e Bashkuara raportuan thuajse 1 milionë infeksione të reja me koronavirus ditën e Hënë, që është shifra më e madhe ditore e çdo vendi në botë dhe thuajse sa dyfishi i majës së mëparshme në SHBA, të arritur në javën e kaluar.
Inventarët e benzinës në SHBA u rritën me 7.1 milionë fuçi në javën që përfundoi më 31 dhjetor, sipas Institutit Amerikan të Naftës. Rritja e inventarëve, që tejkaloi pritshmëritë e analistëve, pengoi perspektivën optimiste të investitorëve të tregtisë së kaluar, ku çmimet u rritën me mbi 1%, pasi tregu e interpretoi si shenjë besimi nga ana e kërkesës, vendimin e OPEC për të rritur prodhimin në muajin e ardhshëm.
Organizata e Vendeve Eksportuese të Naftës, së bashku me vendet aleate si Rusia, që njihet si OPEC+, ra dakord ditën e Martë për të shtuar 400,000 fuçi në ditë në treg nga muaji Shkurt, si ç’ka bërë çdo muaj që prej Gushtit 2021. Vendimi për të mbajtur premtimin e rritjes së prodhimit reflekton besimin e kartelit se Omicron do të ketë ndikim të përkohëshëm tek kërkesa botërore për energji.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.