“Standardi francez” për Shqipërinë, zbardhet propozimi në Kuvend: Në fushatë, kufiri maksimal i shpenzimit, 10 lekë për person!
Ashtu sikurse u paralajmërua një ditë më parë në seancë plenare nga deputeti Ben Blushi, në Kuvend është depozituar zyrtarisht amendamenti për vendosjen e një tavani për shpenzimet në fushatë zgjedhore. Amendamenti mban firmën e deputetëve Ben Blushi e Mimoza Hafizi e parashikon zbatimin e standardit francez për shpenzimet elektorale.
Në relacionin e amendamentit, evidentohet se tavani i shpenzimeve elektorale për Shqipërinë është llogaritur bazuar në një model të konsoliduar europian, modelin francez, i cili, duke marrë parasysh disa elemente, përcakton një vlerë rreth 0.6 euro për banor, që nuk duhet kaluar gjatë fushatës së zgjedhjeve parlamentare.
E në kontekstin shqiptar, sipas përllogaritjeve të deputetëve propozues, rezulton se për Shqipërinë duhet përcaktuar një vlerë 10 lekë për banor, raporton SCAN. “Kemi marrë parasysh raportin mes GDP për capita në të dyja vendet dhe kemi gjetur që ekuivalenti ynë do të ishte 0.073 euro ose 100 lekë të vjetra për banor. Tavani i shpenzimeve për çdo parti politike vendoset tek kjo shifër, shumëzuar me numrin e banorëve dhe shkon në proporcion me numrin e kandidatëve me të cilët partia politike futet në zgjedhje. Kështu, shpenzimet e një partie politike në fushatë nuk lejohet të kalojnë vlerën 42 milionë lekë ose afro 300 mijë euro dhe mesatarisht shpenzimi i lejuar për kandidat për deputet nuk mund të jetë mbi 300 mijë lekë” shkruhet në relacion.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.