Starbucks, shërbim shpërndarje të kafesë në Kinë – Partneritet me Alibaba
Zinxhiri i kafeneve me bazë në Seattle është duke u bashkuar me gjigantin kinez të teknologjisë Alibaba për të nisur ofrimin e shërbimeve në shtator.
“Partneriteti me Alibaba do të riformësojë shitjen me pakicë moderne dhe paraqet një arritje të rëndësishme në përpjekjet tona për të tejkaluar pritshmëritë e konsumatorëve kinezë,” u shpreh presidenti i Starbucks, Kevin Johnson në një deklaratë.
Kafenetë dhe produktet e Starbucks do të jenë në dispozicion për porosi në platformën Ele.me Për shpërndarjen e ushqimit të Alibaba kompania e kafesë do të hapë “kuzhina të shpërndarjes” në dyqanet ushqimore të Alibabës për të ndihmuar në krijimin dhe shpërndarjen e pijeve Starbucks. Çdo gjë mund të paguhet me anë të platformës së pagesës së Alibaba, Alipay.
Shërbimet e shpërndarjes fillimisht do të lançohen vetëm në Pekin dhe Shangai, por Starbucks synon t’i shpjerë ato në 200 dyqane në 30 qytete kineze deri në fund të këtij viti.
Kina ka qenë një vend i ëmbël për Starbucks për vite me radhë. Por në qershor, kompania raportoi një ngadalësim të papritur në rritjen e Kinës, pak javë pasi kishte njoftuar planet për zgjerimin e shpejtë në vend.
Morgan Stanley kohët e fundit uli vlerësimin për Starbucks, duke parashikuar një rënie të vazhdueshme të shitjeve në Kinë dhe Shtetet e Bashkuara.
Starbucks gjithashtu po përballet me presione në Kinë që vijnë nga një konkurrent vendas.
Luckin Coffee hapi dyqanin e saj të parë në Kinë më pak se një vit më parë dhe është rritur shpejt duke pasur më shumë se 500 dyqane në qytete të mëdha. Shumë prej klientëve të saj porositin kafetë në internet, i marrin ato në dyqan dhe paguajnë për to duke përdorur WeChat Pay të Tencent.
Luckin gjithashtu ka promovuar në mënyrë agresive shërbimet e saj të shpërndarjes, dhe ofron zbritje të mëdha për klientët e rinj. Shfrytëzuesit e Luckin duhet ta shkarkojnë aplikacionin për të porositur kafe edhe kur shfaqen për të blerë atë personalisht.
s.g/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.