Statistikat zyrtare/ Në 1 vit, popullsia e Shqipërisë u pakësua me 0.6 %. 27,6 mijë persona humbën jetën

Popullsia e Shqipërisë më 1 janar  2021  rezulton  2,83  milion  banorë, duke pësuar rënie prej 0,6 % krahasuar me një vit më parë. Këto janë shifrat e publikuara nga Instituti i Statistikave. Sipas Instat, gjatë vitit 2020 kanë lindur rreth 28,1 mijë foshnje, ndërsa kanë vdekur rreth  27,6  mijë  persona. Sa i përket vdekjeve, zyrtarisht nga ministria e Shëndetësisë si rrjedhojë e Covid kanë humbur jetën 2 mijë e 594 persona.

Numri  i lindjeve vazhdon të tejkalojë numrin e vdekjeve, pavarësisht se diferenca midis tyre po ngushtohet me kalimin e viteve. Kjo diferencë në vitin 2020 është rreth 500 banorë.

Faktorët që kanë ndikuar në uljen e numrit të popullsisë së Shqipërisë?

Një faktor kryesor, sipas INSTAT është migracioni neto që vazhdon të mbetet negativ (diferenca midis imigrantëve dhe emigrantëve), duke rezultuar në rreth 16,7 mijë persona për vitin 2020 të larguar, më shumë se sa të ardhur.

Më 1 janar 2021 grupmosha 60-79 vjeç zë 18,9 % të popullsisë gjithsej, nga 18,4 % që zinte më 1 janar  të vitit 2020. Tendencë në rritje shfaq edhe grupmosha mbi 80 vjeç.

Grupmosha  0-14  vjeç  paraqet tendencë në rënie, duke zënë 16,5 % të popullsisë më 1 janar  të vitit 2021, krahasuar me 16,8 % që zinte më 1 janar  të vitit 2020.

Në  vitin  2020  jetëgjatësia  për meshkujt  është  75,2  vjet  dhe  për femrat është 79,6 vjet. Ky tregues ka pësuar rënie për të dy gjinitë krahasuar me 2019, si pasojë e pandemisë së shkaktuar  nga  Covid  19.  Rënia  më e madhe vihet re tek meshkujt, ku jetëgjatësia ka pësuar rënie me rreth 2 vite

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.