Sterilizimi edhe në Vlorë – Manastirliu: Pajisje të reja me vlerë 4.5 mln euro në të gjithë spitalet rajonale
Shërbimi i sterilizimit dhe instrumenteve të rinj kirurgjikalë ka nisur edhe në spitalin rajonal të Vlorës, ku 5 mijë operacione në vit do të kryhen tashmë me këto mjete. Ministrja e Shëndetësisë dhe Mbrojtjes Sociale, Ogerta Manastirliu tha gjatë vizitës së saj në spitalin rajonal të Vlorës se ky investim ka për qëllim rritjen e sigurisë së pacientëve.
“Ne do të përmbyllim shumë shpejt investimet në kuadër të programit të sterilizimit dhe instrumenteve të rinj kirurgjikalë për 50 mijë operacione në vit që kryhen në spitalet tona, duke ofruar më shumë siguri për pacientët dhe për mjekët një standard të ri të ofrimit të shërbimit”.
Duke u ndalur te punësimet e reja që ka sjellë investimi i sterilizimit dhe instrumenteve të reja kirurgjikalë, Manastilriu deklaroi se deri tani janë 216 punësuar. Ndërkohë me shtrirjen e investimit në të gjithë spitalet e vendit priten edhe 94 të punësuar të rinj.
Ministrja shtoi më tej se të gjithë spitalet rajonale do të përfitojnë pajisje të reja me vlerë 4.5 milionë lekë në kuadër të programit kombëtar të fuqizimit të spitaleve rajonale me qëllim ofrimin e shërbimit më pranë vendbanimit të qytetarëve.
“Vijojmë investimet në këtë spital, duke filluar nga mamografi i ri që instalohet shumë shpejt dhe një sërë aparaturash të tjera biomjekësore me vlerë 680 mijë euro që do të plotësojnë flotën e aparaturave në spitalin e Vlorës. Jo vetëm Vlora, por të gjithë spitalet rajonale do të përfitojnë nga programi kombëtar i fuqizimit të spitaleve rajonale me pajisje të reja me vlerë 4.5 milion euro në mënyrë që pacientët që deri dje detyroheshin të vijnë në Tiranë për një ekzaminim, tashmë të mund ta kryejnë pranë vendbanimit me aparaturat e fjalës së fundit të teknologjisë. Modelin e QSUT do ta shtrijmë në të gjithë Shqipërinë”, tha Manastirliu.
Ndërkohë, Shefi i Shërbimit të Kirurgjisë, dr. Besnik Elezi vuri theksin te infeksionet post-opratore, që sipas tij janë reduktuar ndjeshëm me përdorimin e këtyre instrumenteve.
Shërbimi i sterilizimit dhe instrumenteve të rinj kirurgjikalë ka nisur ndërkohë në spitalet universitare të Tiranës, spitaleve rajonale të Durrësit, Shkodrës dhe Elbasanit si dhe spitalit bashkiak të Librazhdit.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.