Sterilizimi i instrumenteve mjekësore, nis shërbimi në spitalin rajonal të Shkodrës – Brenda muajit edhe në atë të Elbasanit
Shërbimi i sterilizimet dhe instrumentave të rinj është shtrirë tashmë edhe në Spitalet Rajonale, duke arritur edhe në sallat e kirurgjisë të spitalit të Shkodrës. Ky program modern sterilizimi rrit në këtë mënyrë sigurinë për pacientët që u nënshtrohen operacioneve dhe do të redukton rrezikun për infeksione spitalore.
Ministrja e Shëndetësisë dhe Mbrojtjes Sociale, Ogerta Manastirliu, inspektoi nga afër këtë investim.
“Pas shtrirjes së programit të sterilizimit në të gjithë shërbimet kirurgjikale në 5 spitalet universitare të Tiranës, ky program modern ka nisur tē funksionojë edhe në spitalin Rajonal të Shkodrës, ku është ngritur centrali i sterilizimit të instrumenteve kirurgjikalë. Ky shërbim do të mbulojë edhe spitalin e Lezhës dhe Pukës për rreth 5,000 ndërhyrje në vit, duke zëvendësuar autoklavat e vjetra, të amortizuara, të cilat deri më sot nuk kanë mundësuar të sigurojnë standardet europiane të sterilizimit”, u shpreh Manastirliu.
Vlera e këtij investimi për spitalin Rajonal të Shkodrës është 1.2 milion Euro.
“Brenda muajit Dhjetor ky shërbim do të ofrohet edhe në spitalin e Elbasanit dhe në 6 muajt e parë të vitit 2018 do të shtrihet në të gjithë spitalet e vendit, duke rritur sigurinë për pacientët dhe duke përmirësuar kushtet e punës së mjekëve”, u shpreh Ministrja.
Programi i sterilizimit parashikon furnizimin e të gjithë spitaleve të vendit me instrumenta të rinj kirurgjikalë modernë; sterilizimin cilësor të instrumenteve kirurgjikalë; ofrimin e materialeve të buta ndihmëse njëpërdorimëshe për ekipin mjekësor dhe shtratin e operacionit; dezinfektimin e sallës së operacionit në fund të ditës; përpunimin e mbeturinave të rrezikshme dhe shndërrimin e tyre në mbetje urbane; ofrimin e set-it të personalizuar sipas çdo lloj ndërhyrje kirurgjikale.
A.H./SCAN
Programi modern i sterilizimit në Shkodër
Posted by Ogerta Manastirliu on Sunday, December 10, 2017
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.