Përfaqësuesit e minoriteteve në ‘60 minuta’, OMONIA, ARUMUNËT, MAQEDONASIT: S’jemi dakord me nismën e qeverisë, 20% prag i lart
Në një nismë të re, qeveria po synon t’i japë më shumë të drejta minoriteteve në Shqipëri, duke përcaktuar si kriter vetëm mbledhjen e 300 firmave dhe një vendim të këshillit bashkiak, për të përfituar tabela rrugore në gjuhën e tyre, shkollim apo tjetër.
Për të debatuar mbi këtë nismë të re, emisioni ’60 minuta’ me moderator Arbër Hitaj ka ftuar në studio Z. Ilia Gjoka nga shoqata Liga e Armunëve, Z.Vasil Sterjovski, deputet dhe përfaqësues i komunitetit maqedonas dhe Vasil Kajo, kreun e Omonias.
Ilia Gjoka është shprehur mbi domosdoshmërinë e një censusi të ri, i cili idealisht duhet bërë që këtë vit, sa më shpejt të jetë e mundur, sepse censusi i vjetër është kontestuar nga të gjitha minoritetet.
Vasil Sterjovski është shprehur se ligji për minoritetet është dhe kërkesë për anëtarësimin në BE. “Çdo vend që të integrohet në familjen evropiane duhet fillimisht të ketë siguruar dhe pakicat kombëtare nëpërmjet sferës juridike”, ka thënë ai. Lidhur me problemet e nismës së qeverisë, ai ka përmendur fillimisht se kuota 20% në bashki për tu përcaktuar si minoritet është problematike për shkak se reforma territoriale i ka ndarë popullsitë minoritare, duke i shkrirë ato, e rrjedhimisht është shumë i vështirë organizimi i minoriteteve në një bashki të caktuar.
Vasil Kajo është shprehur se me këtë nisëm, qeveria shqiptare tregon se nuk ka realisht vullnet për të mbrojtur minoritetet. “Vullnetin qeveria nuk mund ta tregojë duke na lënë të mbledhim firma por duke parashtruar rrugët e duhura juridike për të na mbrojtur si pakica”. I pyetur nga moderatori Hitaj nëse qeveria greke ka pasur ndonjë reagim për këtë nisëm të re, Kajo është shprehur se Greqia zyrtare ende nuk ka reaguar pasi nisma ende nuk është konkretizuar zyrtarisht. “Greqia nuk ka pasur asnjë ndikim në këtë nismë të qeverisë shqiptare” ka përfunduar Z.Kajo.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.