Sterlina në 2020-ën – Analistët: Fokusi do të jetë te ekonomia, Brexit

Analistët presin që paundi britanik të reagojë më shumë ndaj indikatorëve kryesorë ekonomikë të vendit gjatë këtij viti sesa nga lajmet që rrethojnë Brexit, e që tashmë është kthyer në një sagë që duket se ska fund. Gjatë kësaj jave, kryeministri britanik, Boris Johnson u takua me numrin një të Komisionit Europian, Ursula Von Der Leyen, për të diskutuar mundësinë e një marrëveshje tregtare me zero tarifa. Ndërkohë Britania pritet të dalë nga Bashkimi Europian në fund të këtij muaji.

Pas daljes së Mbretërisë nga unioni, fokusi kryesor i investitorëve do të jetë pikërisht ekonomia, pra se si do të reagojë ekonomia britanike pas daljes. Edhe paundi britanik duket se do të ndjekë këtë logjikë. Përgjatë vitit, indikatorët ekonomikë, fiskalë dhe monetarë duket se do të jenë ata që do të ndikojnë në ecurinë e sterlinës, thonë analistët. Pas fitores  së thellë të konservatorëve në zgjedhjet e fillim dhjetorit, sterlina u rrit ndjeshëm, e që më vonë u pasua nga një rënie, si pasojë e paqartësive në lidhje me marrëveshjen e daljes nga unioni.

Analistët parashikojnë një rritje të lehtë të sterlinës, kundrejt dollarit amerikan, gjatë këtij viti. Javët e ardhshme bashkë me vendimmarrjen e Bankës së Anglisë do të jenë vendimtare për të përcaktuar edhe një farë ecurie të monedhës vendase.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.