Stimulimi i sipërmarrësve të rinj – Jepen 80 mln lekë për ngritjen e qendrës multifunksionale
Rreth 80 milionë lekë është shuma që pritet të shpenzohet për ngritjen e një Qendre Multifunksionale Shërbimesh për të rinjtë sipërmarrës në Tiranë.
Agjencia për Zhvillimin Ekonomik Rajonal ka shpallur fituesin e tenderit, ndërkohë që në datën 29 dhjetor është lidhur edhe kontrata, me një afat zbatimi prej 8 muajsh.
Sipas Agjencisë, mungesa e hapësirave të përbashkëta të punës, si ambiente që nxisin inovacionin, bashkëpunimin dhe shkëmbimin e ideve dhe kontakteve, është një nevojë që duhet adresuar sa më shpejt në mënyrë që dhe Tirana të ecë me të njëjtat hapa zhvillimi ekonomik si kryeqytetet e tjerë.
Target grupi kryesor, që do të asistohen në këtë qendër janë të rinjtë e të rejat nga e gjithë Shqipëria që duan të bëhen sipërmarrës si dhe kanë ide novatore.
Po ashtu, sipas Agjencisë për Zhvillimin Rajonal, ofrimi i hapësirave të tilla, jo vetëm që do të stimulojë komunikimin, bashkëpunimin dhe shkëmbimin e ideve, por do të ofrojë mundësinë e mbështetjes se njëri-tjetrin duke krijuar një ndjenjë të fortë komuniteti dhe përkatësie.
Ndër objektivët specifikë të kësaj qendre do të jetë nxitja dhe mbështetja e ekonomisë rajonale, ekosistemit sipërmarrës, krijimtarisë dhe inovacionit duke krijuar një hapësirë bashkëpunuese dhe një pike lidhëse për teknologjitë e reja, lëvizshmërinë, etj.
Burimi i financimit për këtë qendër është granti i Fondit të Zhvillimit të Rajoneve për infrastrukturën vendore dhe rajonale.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.