Stoqet në gjykata, propozohet zgjidhja alternative – Projektligji: Jo më trupa po një gjyqtar në shkallë të parë, GJKKO nga 5 të bëhen me 3

Akumulimi i dosjeve të pashqyrtuara në të gjitha shkallët e gjyqësorit për shkak të mungesës së gjyqtarëve të shkarkuar nga Vetting-u është kthyer në një shqetësim të mprehtë. Shkak për të cilin Kuvendi duket se do t’I drejtohet zgjidhjeve alternative, të cilat nisin nga shmangia e trupave dhe marrja e vendimeve nga 1 gjyqtar në shkallët e para, ushtrimit nga zëvendëskryetarët të kompetencave të kryetarëve të gjykatave, shtimi i rekrutimeve të Këshilltarëve dhe ligjorë duke zbutur kriteret që duhet të plotësojnë kandidatët.

Është depozituar në Kuvend Projektligji me një seri ndryshimesh në Ligjin “Për organizimin e pushtetit gjyqësor Republikës se Shqipërisë”, i cili përmes 7 ndërhyrjeve kërkon t’i hapë rrugë shkarkimit të dosjeve.

Së pari ndryshimet bëjnë të mundur që shkallët e para të gjykojnë me një gjyqtar të vetëm dhe jo me trupa jo vetëm çështjet e zakonshme, por edhe ato urgjente. Së dyti, bëhet e mundur që në rastet kur mungon Kreu I Gjykatës, kompetencat të ushtohen nga zëvendëskryetari, duke lehtësuar edhe kriteret për zgjedhjen e këtij të fundit. Së treti hiqet detyrimi për plotësimin e kuorumit në Këshillin e Gjykatës, duke u mjaftuar me pjesëmarrjen e shumicës së gjyqtarëve. Së katërti, Ndryshime të rëndësishme janë parashikuar edhe për sa i përket dispozitave qe lidhen me Kolegjet e Gjykatës se Lartë, të cilat tashmë do të kenë të drejtë të marrin vendime me tre gjyqtarë.

Pikat 5, 6 dhe 7 të ndryshimeve krijojnë lehtësi për rekrutimin e Këshilltarëve Ligjorë në Gjykatën e Lartë, Ndihmësve Ligjorë në Gjykatat e shkallëve të tjera, duke lehtësuar njëherësh edhe pagën e nëpunësit civil gjyqësor pranë Gjykatave të Posaçme kundër Korrupsionit e Krimit të Organizuar.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.