Strategjia Kombëtare e Arsimit 2021-2026: Kosto totale për zbatimin e strategjisë është 58.81 miliardë lekë
Ministria e Arsimit dhe Sporteve ka përgatitur strategjinë kombëtare të arsimit për periudhën 2021-2026, e cila është botuar në fletoren zyrtare. Kosto totale për zbatimin e strategjisë është 58.81 miliardë lekë, prej të cilave 37.48 miliardë lekë (63.7%) për arsimin parauniversitar, 271.57 milionë lekë (0.4%) për menaxhimin e sistemit të arsimit dhe 21.06 miliardë lekë (31.3%) për arsimin e lartë. Për periudhën afatmesme 2021–2023, kosto është vlerësuar në 25.41 miliardë lekë.
Sipas këtij dokumenti, për të ndjekur monitorimin e progresit, Komisioni Europian ka propozuar pesë objektiva në nivelin e Bashkimit Europian:
- Pjesa e nxënësve 15-vjeçarë me rezultate të ulëta në lexim, matematikë e shkenca duhet të jetë më pak se 15%;
- Pjesa e nxënësve 15-vjeçarë me rezultate të ulëta në njohuritë kompjuterike dhe të sistemeve të informacionit duhet të jetë më pak se 15%;
- Të paktën 98% e fëmijëve në moshën nga 3 vjeç deri në nisjen e shkollës duhet përfshihen në edukimin në fëmijërinë e hershme;
- Pjesa e të rinjve në moshë 20–24 vjeç me të paktën një kualifikim të nivelit të arsimit të mesëm -të lartë duhet të jenë të paktën 90%.
- Pjesa e individëve në moshë 30-34 vjeç me arsim të lartë duhet të jetë të paktën 50%.
Programi Buxhetor Afatmesëm (PBA) 2021–2023 nuk parashikon ndonjë rritje të ndjeshme të buxhetit për arsimin parauniversitar, ndërkaq brenda periudhës 3-vjeçare parashikohet rritje e buxhetit vjetor në arsimin e lartë me 21.9%, në raport me vitin 2020.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.