Strategjia për menaxhimin e mbetjeve – Klosi: Për herë të parë një hartë të venddepozitimeve në të gjithë vendin
Është prezantuar sot dokumenti I Strategjisë Kombëtare për Menaxhimin e Integruar të Mbetjeve si dhe Plani I veprimit. Në fjalën e tij, ministri i Turizmit dhe Mjedisit tha se institucioni që ai drejton ka ndërmarrë veprime konkrete që I paraprijnë kësaj strategjie.
Ndërkohë, kanë përfunduar dhe janë gati të miratohen nga Këshilli i Ministrave dy projektvendimet për ndalimin dhe prodhimin e qeseve plastike të patretshme dhe ai për kostimin e menaxhimit të mbetjeve urbane.
Klosi shtoi më tej se janë dy hapa të tjerë që po ndërmerren në vijim të veprimeve konkrete që lidhen me identifikimin e venddepozitimeve të mbetjeve si dhe rishikimi I kritereve mjedisore për landfillet me qëllim funksionimin e tyre sipas standardeve të duhura.
“Strategjia do të ishte si shumë të tjera nëse nuk do të përkthehej në disa veprime konkrete të cilat ne kemi filluar që t’i ndërmarrim. Sot ministria së bashku me prefektët është përpjekur që për herë të parë të ketë një hartë reale se ku ndodhen venddepozitimet e mbetjeve urbane, dhe në 300 venddepozitime të mëdha dhe të vogla në vendin tonë vërejmë atë që të konstaton edhe strategjia që shumë pak prej tyre kanë standarde mjedisore për të qenë landfille dhe vendgrumbullime të vërtetë të mbetjeve urbane.”
Identifikimi i venddepozitimeve dhe mbledhja e informacioneve rreth tyre është një iniciativë që po zhvillohet për herë të parë, në bashkëpunim me agjencitë gjermane dhe zvicerane.
Duke u ndalur te aksioni “Pastrojmë Tokën që duam” që do të zhvillohet 16-22 prill me qëllim pastrimin e shtretërve dhe vijën bregdetare, Klosi kërkoi mbështetjen e të gjithë partnerëve që t’i bashkohen kësaj nisme në kuadër të sezonit të ri turistik.
“Ne duam të bëjmë një aksion shumë të madh në javën e Tokës, në Ditën e Tokës, “Të pastrojmë Tokën që duam”, sepse mendojmë që nuk mund të futemi në sezonin turistik të këtij viti që pritet të jetë një nga sezonet më të mirë turistikë të ndodhur ndonjëherë në vendin tonë, me shumë kërkesa dhe për herë të parë me një numër shumë të madh kërkesash nga operatorë turistikë të huaj, dhe të kemi një situatë si kjo që kemi sot”, tha Klosi.
Përmes kësaj strategjie, synohet reformimi i mënyrës së menaxhimit të mbetjeve me qëllim përmirësimin e situatës në vend.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.