Strategjia që do të ndjekë Shqipëria për vaksinën anti-Covid! Cilët do të përfitojnë të parët nga 1.1 milionë vaksinat

Qeveria shqiptare ka paguar kaparin për COVAX. Kjo ëhstë njoftuar nga kryeministri Edi Rama në fjalën e mbajtur në parlament kur evidentoi masat e deritanishme që vendi ynë ka marrë për t’u përballur me pandeminë. Kryeministri evidentoi se se Shqipëria ka hyrë në rrjetin e shteteve që kanë prenotuar financiarisht aksesin në vaksinën që pritet të dalë për përdorim masiv në muajt që vijnë.

“ Po ashtu, ne jemi në komunikim të përditshëm me Bashkimin Europian. Unë kam pasur një bisedë të gjatë me Presidenten e Komisionit të premten e shkuar, me disa nga kryeministrat, para se të vija këtu me kancelarin e Austrisë, për të garantuar qartësi dhe siguri për aksesin në vaksinimin e popullsisë, duke pasur parasysh që vaksina do të dale, por sasitë që do të jenë të disponueshme, nuk do të jenë menjëherë të atilla që do të mbulojnë gjithë popullsinë e përgjithshme të Europës apo dhe të cilitdo vend dhe të gjitha vendet kanë një strategji” tha kryeministri.

Sa i përket strategjisë, kryeministri ka evidentuar se do të fillohet me vaksinimin falas të të gjithë kategorive më të prekshme, më vulnerabël e pastaj për ta shtrirë vaksinimin falas në të gjitha shtesat e popullsisë.

“Ajo që është e rëndësishme, është që ne sot jemi gati për të patur akses dhe ndërkohë po punojmë si dhe të tjerët për të ndërtuar aleancat e duhura sepse kështu po ndodh faktikisht me vendet e tjera në mënyrë që të mos mbetemi mbrapa të tjerëve. Këtë po bëjnë të gjithë, këtë po bëjmë edhe ne dhe jam optimist që Bashkimi Europian do të jetë gjithëpërfshirës në strategjinë e vet për të garantuar vaksinimin e popullsive dhe në këtë proces gjithëpërfshirës, edhe rajoni ynë, që do të thotë edhe Shqipëria do të jenë pjesë” tha kryeministri.

Qeveria shqiptare  ka nisur procedurat e blerjes së afro 1.1 milionë doza vaksinash kundër infeksionit COVID-19, të cilat do të mbulojnë 20 për qind të popullisë më të rriskuar.   Marrëveshja e nënshkruar midis Ministrisë së Shëndetësisë dhe Mbrotjes Sociale  dhe Aleancës GAVI, për pjesëmarrjen në strukturën globale të qasjes në vaksinat COVID-19 (COVAX Facility), është depozituar për diskutim në Komisionet Parlamentare.

Sipas marrëveshjes, qëllimi është blerja e vaksinës kundër COVID-19 dhe prokurimi sa më i shpejtë për shkak të urgjencës që paraqet dhe rritjes së numrit të infekimeve. Kështu, edhe pse ende nuk ka një vaksinë të certifikuar,  qeveria shqiptare angazhohet të paguajë paraprakisht afro 4 milionë dollarë për blerjen e dozave të nevojshme, prej të cilave 456 mijë dollarë do të përdoren si shumë garancie për ndarjen e rrezikut.  Koordinuar nga GAVI, COVAX-i synon t’i arrijë qëllimet për prodhimin e vaksinës anti-covid, duke vepruar si një platformë që do të mbështesë kërkimin, zhvillimin dhe prodhimin e një game të gjerë të kandidatëve për vaksina COVID-19 dhe të negociojë çmimet e tyre.

Qëllimi fillestar është që të ketë 2 miliardë doza në dispozicion deri në fund të vitit 2021, të cilat duhet të jenë të mjaftueshme për të mbrojtur njerëzit me rrezikshmëri të lartë kontaminimi, si dhe punonjësit e vijës së parë të kujdesit shëndetësor. Vaksina e cila do të prokurohet nga autoritetet shqiptare duhet të ketë kualifikimin parapak të OBSH-së ose që mbi baza të jashtëzakonshme, minimalisht, zotëron licencën/autorizimin e vendosur nga një SRA.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.