Studim tregu për turizmin – Qeveria, konsulent ndërkombëtar për Jugun

Fondi Shqiptar i Zhvillimit njoftoi së fundmi se po kërkon një konsulent  ndërkombëtar, i cili do të hartojë një raport final që do të fokusohet tek turizmi në jug të Shqipërisë.

Komponenti është pjesë e projektit që financohet nga Banka Botërore, i fokusuar në Zhvillimin e Integruar Urban dhe Turizmin dhe që synon të bëjë një kërkim të detajuar tregu në katër bashki duke nisur nga Gjirokastra, tek Berati, Përmeti dhe Saranda.

Kredia e dhënë nga Banka Botërore kap vlerën 63.8 milionë euro, por financimi për kërkimin e tregut zë vetëm një pjesë të  vogël të kësaj kredie.

Por cilat do të jenë detyrat e konsulentit ndërkombëtar?

Së pari është hartimi i një raporti fillestar që do të analizojë situatën aktuale të turizmit në të katërta bashkitë. Së dyti do të zërë vend hulumtimi i tregut. Së treti një plan veprimi si dhe një strategji zhvillimi produkti dhe tregu. Detyra e katërt për konsulentin është zhvillimi i termave të referencës për zbatimin e strategjisë së zhvillimit të tregut.

Sipas parashikimit të procedurave pritet që konsulenti të lidhë një kontratë brenda Shtatorit dhe të fillojë punën në Tetor për ta mbyllur atë në Qershor të vitit të ardhshëm.

Synimi i gjetjeve të studimit por edhe i strategjisë është kthimi i katër bashkive në qendra kyç të turizmit dhe me një vizion afatgjatë, përtej viteve që mbulon projekti i Bankës Botërore.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.