Studimi/ Çfarë është mjegulla mendore e shkaktuar nga Covid-19?!
Çorientimi dhe lodhja konjitive e raportuar nga pacientët me Covid ndoshta kanë të bëjnë me mbërritjen e qelizave të palcës së kockave në tru.
Çorientimi, konfuzioni, vështirësia në përqendrim dhe ngadalësia konjitive: këto janë simptomat e të ashtuquajturës mjegull mendore, humbja e përkohshme e kthjelltësisë që duket se prek disa nga njerëzit e infektuar me Covid, pa marrë parasysh nëse kanë simptoma të rënda apo jo . Shkaqet e këtij çrregullimi të vërejtur në të gjitha moshat, i cili nganjëherë zgjidhet pas muajsh shërimi, janë debatuar për disa kohë, dhe tani një studim që ka vëzhguar nga afër trurin e pacientit ofron një shpjegim të besueshëm.
Teoria më e akredituar thotë që në origjinë të mjegullës njohëse nga Covid të ketë një përgjigje imune ndaj sulmit të koronavirusit dhe inflamacionit pasues të indeve: deri më tani, megjithatë, autopsitë e kryera mbi viktimat e infeksionit nuk kanë treguar shenja të inflamacionit, as ndryshimet që i atribuohen një infeksioni viral të vazhdueshëm.
Për ta parë më qartë, studiuesit nga Universiteti Johns Hopkins dhe Spitali i Grave dhe Brigham në Boston analizuan një pjesë të korteksit cerebral të 15 pacientëve që vdiqën nga CoViD-19, të cilët gjithashtu kishin simptoma neurologjike. Në pesë nga këta pacientë, analizat mikroskopike të kapilarëve kortikalë, domethënë rrjeti i dendur i enëve të holla të gjakut që ujitin korteksin, zbuluan disa bërthama të qelizave jashtëzakonisht të mëdha. Struktura e këtyre bërthamave, sipas shkencëtarëve, është në përputhje me atë të megakariociteve, qelizave të mëdha të palcës së kockave të cilat, kur copëtohen, lindin trombocitet e nevojshme për mpiksjen e gjakut.
Sipas studimit të botuar në JAMA Neurology, ato megakariocite ishin në vendin e gabuar. Prania e tyre nuk ishte dokumentuar kurrë më parë në kapilarët kortikalë, dhe autopsitë e kryera në dy persona që nuk kishin vdekur nga Covid nuk treguan gjurmë të këtyre qelizave në tru. Duke i gjetur ato në vetëm 5 nga 15 pacientë mund të jetë për shkak të sasisë së vogël të indeve të analizuara zakonisht në analizimet e autopsisë: në trurin e pacientëve Covid që ankohen për çrregullime neurologjike, megakariocitet mund të jenë më të përhapura sesa mendoni. Sidoqoftë, mostra e pacientëve është mjaft e vogël dhe këto hipoteza fillestare do të mbështeten nga studime të tjera.
Si arritën ato qeliza në tru? “Ne dyshojmë se SARS-CoV-2 dëmton indet e mushkërive duke çuar në lëshimin e sinjaleve kimike që bëjnë që megakariocitet të udhëtojnë atje nga palca e kockave”, shpjegojnë autorët. “Kur kjo të ndodhë, këto qeliza të mëdha e gjejnë rrugën e tyre përmes kapilarëve pulmonarë dhe në tru”. Është ende e paqartë nëse qelizat arrijnë korteksin thjesht përmes qarkullimit të gjakut, në mënyrë pasive, ose nëse ndryshimet specifike të indeve për shkak të Covidi lejojnë kapilarët e trurit t’i kapin ato më lehtë. (FOCUS)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.