Studimi i Harvard Business Review: Kostot e të qënurit një menaxher i kujdesshëm

Një nga gjërat që menaxherët duhet “të menaxhojnë” është raporti njerëzor. Si një punonjës i një kompanie është në zgjedhjen tënde të lirë nëse dëshiron të “kujdesesh” për emocionet e kolegut tënd apo jo, ndërsa si menaxher, është apo nuk është në “listën e dëshirave”, i duhet kushtuar rëndësi edhe marrëdhënieve njerëzore.

Sipas disa studimeve të publikuara nga Business Harvard Review, menaxherët shpenzojnë të paktën 2 orë e gjysmë çdo javë duke ju përgjigjur problemeve të punonjësve të tyre, duke filluar që nga marrëdhëniet në çift të stafit, e deri te kujdesi për fëmijët apo “barrat” emocionale të tyre.

Nisur nga fakti që secili nga ne shpenzon një kohë të gjatë në punë, atëherë është e kuptueshme se pse problemet personale i adresohen menaxherëve dhe pse më tepër menaxherëve sesa kolegëve, pasi në subkoshiencën e punonjësve është e ngulitur ideja se është përgjegjësi e drejtuesit të kujdeset edhe për problemet emocionale të tij apo të saj. Kjo nuk është surprizë, por, ajo që në fakt të bën përshtypje është se sa pak punonjësit e dinë se si ndikon ky transferim emocionesh te liderët e tyre.

Harvard Business Review ka anketuar 43 menaxherë përgjatë çdo dite në 3 javë, sëbashku me punonjësit e tyre përkatës (deri në 5 të tillë), për efekt të një studimi. Menaxherët janë intervistuar në fillim dhe në fund të ditës së punës, lidhur me gjendjen e tyre emocionale. Po ashtu, drejtuesit janë intervistuar edhe për shpeshtësinë me të cilën ju përgjigjen problemeve emocionale të punonjësve. Fokusi ishte te produktiviteti në punë dhe te gjendja emocionale. Nga ana tjetër, “ndjekësit” e këtyre liderëve raportuan lidhur me angazhimin dhe intensitetin e punës së menaxherëve të tyre gjatë secilës ditë.

Në fund të studimit rezultoi se gjendja emocionale e menaxherëve ishte shumë e rënduar në fund të ditëve kur ato ishin marrë në mënyrë të drejtpërdrejtë me problemet personale të stafit. Kjo për dy arsyje; së pari sepse problemet janë sigurisht të pakëndshme, të ndjeshme dhe shqetësuese. Ato krijojnë ngarkesë emocionale e cila i kalon drejtpërdrejtë personit me të cilin i ndan dhe së dyti, sepse të pasurit problem personale i jep shenja alarmi menaxherëve, nëse do të ndikojnë apo jo në produktivitetin në punë, duke i lënë të shqetësuar për pasojat që mund të pasojnë.

Drejtuesit me më shumë vite eksperiencë në role menaxhuese nuk e kishin aq të vështirë përballjen me gjendjen emocionale të punonjësve, kjo patjetër për shkak të eksperiencës dhe “imunitetit” të fituar.

Por, zbulim interesant i studimit të Harvard Business Review është fakti se punonjësit nuk kishin ndonjë vlerësim në veçanti për vëmendjen që i kushtohej nga drejtuesit, në rastet kur kishin probleme personale. Në fakt, në ditët që menaxherët ishin angazhuar për t’i bërë punonjësit të ndihen më mirë, në ato ditë, punonjësit ishin shprehur se drejtuesi i tyre ka qenë më pak produktiv në punë.

Një nga shkaqet pse kjo ndodh, sipas Harvard Business Review, është pasi problemet zgjidhen pas dyerve të mbyllura, duke lënë kështu më pak kohë për menaxherin që të kujdeset për punonjësit e tjerë, të cilët kanë nevojë për mbështetje në çështjet e ndryshme të punës.

Por, çfarë do të thotë kjo? Për menaxherët, absolutisht që ata duhet të vazhdojnë t’i japin suport moral punonjësve të tyre, por duhet të jenë të vetëdijshëm për ngarkesën emocionale që do të marrin mbi supe dhe për ndikimin në performancën në punë. Sidomos në rastet e menaxherëve pa përvojë të mëparshme, duhet të jenë veçanërisht të kujdesshëm dhe përzgjedhës në atë që duan “të mësojnë” më parë.

Përsa i përket punonjësve, edhe ata duhet të jenë të vetëdijshëm për pasojat që “shkarkimi” i tyre lë te menaxherët, sidomos nëse bëhet fjalë për një drejtues të ri. Ajo që është më e rëndësishmja, është mirënjohja, e cila nuk duhet të mungojë kurrsesi, pasi empatia, nuk duhet të merret si e mirëqenë. Fatkeqësisht, të thënurit “faleminderit” nënvlerësohet dhe nuk merr rëndësinë e duhur, por studimi tregon se ndikon në mënyrë të drejtpërdrejtë në pozitivitetin dhe energjinë e mirë të secilit në  një situatë të përfshirë.

Të jesh një drejtues mund të jetë sfiduese dhe stresuese dhe ndihmesa emocionale e punonjësve është taksa që duhet paguar, veçanërisht kur mezi po mbani përgjegjësitë e punës. Studimi i HBR tregon se ju mund të ndihmoni, por është e rëndësishme të zgjidhni strategjikisht kur dhe si e bëni! /HarvardBusinessReview/

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.